Русийә президенти путин келәр айда хитайни зиярәт қилиду


2006.02.21

Хитай ташқи ишлар министирлиқиниң сәйшәнбә күни ашкарилишичә, русийә президенти владимир путин келәр айда хитайни зиярәт қилип, хитай - русийә сияси вә сода - иқтисади мунасивитини кеңәйтиш мәсилилири бойичә сөһбәт елип бариду. Хитай ташқи ишлар министирлиқи баянатчиси лю җйәнчавниң мухбирларға әскәртишичә, русийә президенти зиярәт җәрянида хитай дөләт рәиси ху җиңтав билән учришидикән.

Хитай даирилири 2006 - йилни хитай бойичә "русийә йили" қилип бекиткән. Лю җйәнчав, путинниң зиярити һәққидә тохтилип," бу зиярәт җуңгониң русийә йили мунасивити билән муһим вақит вә йилға тоғра кәлмәктә " деди. Униң әскәртишичә, русийә президенти билән хитай дөләт рәисиниң сөһбити икки дөләт көңүл бөлүдиған хәлқара вә район характерлик мәсилиләргә четилиши мүмкин.

Москва билән бейҗиң шаңхәй гуруһидики йетәкчи дөләтләр болуп, русийә хитайниң шәрқий түркистан күчлирини бастуруш һәрикитини, хитай русийиниң чечинийидики һәрбий һәрикитини қоллиған. Франсийә ахбарат агентлиқиниң тәкитлишичә, америка оттура асияда һәрбий база қуруп, райондики тәсир күчини күчәйтишкә башлиғандин кейин, русийә билән хитай һәмкарлиқ қәдимини тезлитишкә башлиди.

Русийә бу йилниң ахирлири хитай билән японийини риқабәткә селип қойған сибирийә- тинч окян нефит турубисида қурулуш башлайду. Шуниң билән биргә русийә президентиниң зиярити б д т хәвпсизлик кеңишиниң иран ядро мәсилисини музакирә қилидиған дәвригә тоғра кәлмәктә. Лекин лю җйәнчавниң әскәртишичә, русийә президентиниң конкрет зиярәт күнини бекитишкә тоғра келидикән. (Әркин)

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.