Владимир путин хитай зияритини ахирлаштурди


2006-03-22
Share

"Русийә йили" паалийитигә қатнишиш үчүн рәсми зиярәт билән 21 - март күни бейҗиңға кәлгән русийә президенти владимир путин икки күнлүк зияритини ахирлаштурди.

Хитай вә русийә рәһбәрлири тәрипидин өткән йили бекитилгән "дөләт йили" паалийити өткүзүш бәлгилимисигә асасән уюштурулған "русийә йили" ға владимир путин башламчилиқида русийиниң сиясәт, сода-санаәт, мәдәнийәт вә башқа һәр саһәсигә мунасивәтлик миңдин артуқ адәм кәлгән болуп, келишим бойичә 2007-йили русийә һөкүмити мушу хилда мәхсус " хитай йили" өткүзидикән.

Хитай һөкүмити "русийә йили" өткүзүш һәм владимир путини күтүвелиш үчүн наһайити зор дәриҗидә тәйярлиқларни елип барған. Президент путин билән ху җинтав мәхсус йепиқ шәкилдә сөһбәт өткүзгән болуп, улар икки дөләт рәһбәрлириниң бу қетимқи учришиш һәмдә русийә-хитай истраратегийилик һәмкарлиқ мунасивәтлиригә юқири баһа берип, икки дөләт мунасивәтлириниң йүксәк сәвийигә йәткәнликини билдүрүшкән.

Икки күнлүк зиярәт җәрянида русийә билән хитай 29 келишимгә қол қойған болуп, буниң ичидә "русийә-хитай бирләшмә баянати" дин башқисиниң һәммиси дегүдәк иқтисадий, енергийә вә пул-муамилә, мәдәний-маарип вә башқа саһәләргә мунасивәтлик һөҗҗәтләр икән.

Русийиниң итартасс, лента.Ру һәмдә хитайниң шинхуа агентлиқлириниң хәвәрлиридин қариғанда, хитай тәрәп русийә билән болған енергийә саһәсидики һәмкарлиқни күчәйтип, нефит аққузуш туруба қурулушини қолға кәлтүрүшни муһим муддиа қилған, виладимир путин шәрқий сибирийидин хитайға тутишидиған айрим нефит аққузуш турубиси қурушқа һәмдә русийиниң алтай районидин уйғур аптоном райониға тутишидиған тәбиий газ турубиси қуруп, 2011-йилидин етибарән хитайни тәбиий газ билән тәминләшкә мақуллуқ билдүргән.

Лекин, көзәткүчиләрниң баһалишичә, нефит аққузуш турубиси мәсилисидә хитай көзлигән мәқситигә йетәлмигән болуп, бу йәрдә һечқандақ конкрет лайиһә вә яки келишимгә қол қоюлмиған, пәқәт ағзаки қошулушқила еришкән халас. Бир қисим ғәрб көзәткүчилири владимир путиниң хитай билән енергийә, һәрбий вә башқа саһәләр бойичә қоюқ һәмкарлишиш арқилиқ, хитайни өзиниң ғәрбкә қаратқан истратегийиси үчүн қәрт қилип ойнаватқанлиқини илгири сүрмәктә.(Үмидвар)

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт