Wladimir putin xitay ziyaritini axirlashturdi

"Rusiye yili" pa'aliyitige qatnishish üchün resmi ziyaret bilen 21 - mart küni béyjinggha kelgen rusiye prézidénti wladimir putin ikki künlük ziyaritini axirlashturdi.

Xitay we rusiye rehberliri teripidin ötken yili békitilgen "dölet yili" pa'aliyiti ötküzüsh belgilimisige asasen uyushturulghan "rusiye yili" gha wladimir putin bashlamchiliqida rusiyining siyaset, soda-sana'et, medeniyet we bashqa her sahesige munasiwetlik mingdin artuq adem kelgen bolup, kélishim boyiche 2007-yili rusiye hökümiti mushu xilda mexsus " xitay yili" ötküzidiken.

Xitay hökümiti "rusiye yili" ötküzüsh hem wladimir putini kütüwélish üchün nahayiti zor derijide teyyarliqlarni élip barghan. Prézidént putin bilen xu jintaw mexsus yépiq shekilde söhbet ötküzgen bolup, ular ikki dölet rehberlirining bu qétimqi uchrishish hemde rusiye-xitay istraratégiyilik hemkarliq munasiwetlirige yuqiri baha bérip, ikki dölet munasiwetlirining yüksek sewiyige yetkenlikini bildürüshken.

Ikki künlük ziyaret jeryanida rusiye bilen xitay 29 kélishimge qol qoyghan bolup, buning ichide "rusiye-xitay birleshme bayanati" din bashqisining hemmisi dégüdek iqtisadiy, énérgiye we pul-mu'amile, medeniy-ma'arip we bashqa sahelerge munasiwetlik höjjetler iken.

Rusiyining itartass, lénta.Ru hemde xitayning shinxu'a agéntliqlirining xewerliridin qarighanda, xitay terep rusiye bilen bolghan énérgiye sahesidiki hemkarliqni kücheytip, néfit aqquzush turuba qurulushini qolgha keltürüshni muhim muddi'a qilghan, wiladimir putin sherqiy sibiriyidin xitaygha tutishidighan ayrim néfit aqquzush turubisi qurushqa hemde rusiyining altay rayonidin Uyghur aptonom rayonigha tutishidighan tebi'iy gaz turubisi qurup, 2011-yilidin étibaren xitayni tebi'iy gaz bilen teminleshke maqulluq bildürgen.

Lékin, közetküchilerning bahalishiche, néfit aqquzush turubisi mesiliside xitay közligen meqsitige yételmigen bolup, bu yerde héchqandaq konkrét layihe we yaki kélishimge qol qoyulmighan, peqet aghzaki qoshulushqila érishken xalas. Bir qisim gherb közetküchiliri wladimir putining xitay bilen énérgiye, herbiy we bashqa saheler boyiche qoyuq hemkarlishish arqiliq, xitayni özining gherbke qaratqan istratégiyisi üchün qert qilip oynawatqanliqini ilgiri sürmekte.(Ümidwar)