Русийә хитайдин ишчи қобул қилиду


2006.04.23

Хитай мәтбуатлириниң бейҗиңдики русийә учур мәркизиниң мәлуматлиридин нәқил кәлтүрүшичә, русийиниң йирақ шәрқидики чита областиниң башлиқи хитай мәтбуатлириға рәсмий билдүрүш елан қилип, 2006-йили чита областиниң хитайдин қобул қилидиған әмгәкчиләрниң санини 10 миңға йәткүзидиғанлиқини елан қилған. Бу хитай әмгәкчилири мәзкур райондики түрлүк қурулушларда вә көктатчилиқ мәйданлирида ишләйдикән.

Русийә даирилири хитай әмгәкчилириниң бихәтәрликигә капаләтлик қилидиғанлиқини, әгәр уларниң русийә қанунлириға хилаплиқ қилса, дәрһал хитайға қайтурилидиғанлиқини билдүргән. Ашкарилинишичә, өткән йили мәзкур област 1500 нәпәр хитай вә башқа чәтәлликни өз дөлитигә һәйдивәткән икән.

Һазир русийидә "хитай тәһдит" идийиси күчийиватқан шуниңдәк хитайларниң русийиниң адәм шалаң йирақ шәрқигә кирип маканлишишини чәкләш пикирлири күнсайин улғуйиватқан болсиму, әмма русийә мәтбуатлиридики учурларға қариғанда, йеқиндин буян москва сиясәт саһәсидики бир қисим әрбаблар хитайларни көпләп русийигә елип келип уларни ишлитиш арқилиқ йирақ шәрқ вә сибирийә райониниң иқтисадини тәрәққий қилдуруш пикирлирини оттуриға қоюп, москва һөкүмитини хитай тәһдидидин әндишә қилмаслиққа үндәштәк мадарачилиқ һәрикәтлири елип барған. Әнә шуниң сәвәбидин чита области қатарлиқ районлар хәлқниң наразилиқлириға қаримай, хитай ишчилирини көпләп елип кәлмәктә икән. Хитайларниң бу районлардики көп иш орунлирини игиливелиши йәрлик русларниң наразилиқлирини пәйда қилған икән.(Үмидвар)

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.