Rusiye armiyisining bash shitabi bashliqi xitayni ziyaret qildi


2007.03.04

3-Ayning 4-küni rusiye qoralliq küchliri bash shtab bashliqi général armiye baluyéwskiy béyjinggha yétip kélip, 4 künlük xitay ziyaritini bashlidi. En'gliye radi'o téléwiziye shirkiti b b s ning xewiridin melum bolushiche, général baluwéwskiyning meqsiti xitay herbiy da'iriliri bilen ikki dölet herbiy hemkarliqlirining istiqbali, herbiy téxnika hemkarliqi we qoral-yaraq sodisi shuningdek birleshme herbiy manéwér ötküzüsh pilani qatarliq köp terepler boyiche muzakirelishishtin ibaret iken.

Xitayning shinxu'a agéntliqining uchuridin melum bolushiche, yekshenbe küni xitay herbiy ishlar komitétining mu'awin re'isi gu boshung, xitay dölet mudapi'e ministiri saw gu'angchu'en qatarliqlar béyjingdiki birinchi awghust binasida ayrim-ayrim halda baluyéwskiy bilen körüshüp söhbetleshken.

Gu boshung sözide rusiye bilen xitayning " ewladtin ewlad dost bolush, menggü düshmenleshmeslik prinsipi boyiche " öz'ara munasiwetlirini chongqurlashturghanliqigha yuqiri baha bergen.

Uchurlardin qarighanda, rusiye bilen xitay 2007-yili, 7-ayda " tinchliq üchün" dégen nam astida birleshme herbiy manéwér ötküzüshke pütüshken bolup, 2005-yili bu ikki dölet tunji qétim keng kölemde birleshme herbiy manéwér ötküzgen idi. Bu amérika, qatarliq döletlerning diqqitini jelp qilghan, uning üstige ötken ayda rusiye prézidénti wladimir putin amérikini tenqid qilip, washin'gtonning naraziliqini qozghighan, ikki terep bir-birini eyibligen idi.

Tehlillerdin qarighanda rusiye-xitay herbiy da'iriliri yene iran, iraq we afghanistan shuningdek shangxey hemkarliq teshkilati mesilisini öz ichige alghan xelq'araliq hem rayon xaraktérliq mesililernimu muzakire qilishi mumkin iken. (Ümidwar)

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.