Rusiye xitay mallirigha bolghan kontrolluqni kücheytti

Xelq'ara miqyasida xitay mallirigha bolghan kontrolluq we nazaret qilish hetta cheklime qoyush ishlirining küchiyishige egiship, rusiye tamozhna da'iriliri yéqinda xitay mallirigha bolghan kontrol qilish tedbirlirini békitken.

Shinjang xewer torining 28-may tarqatqan uchurigha asaslan'ghanda, 5-ayning bashliridin étibaren rusiyining yiraq sherqidiki tamozhna organliri xitay sayahetchilirining özliri bilen birge rusiyige élip kiridighan nerse-kéreklirige bolghan kontrolluqni kücheytip, her bir ademning özi bilen birge rusiyige élip kiridighan barliq yüklirining 35 kilogramdin ashmasliqini belgiligen. Eger éship ketse her bir kilogramgha töt dollar hem 30 %tin yuqiri baj tölesh belgilen'gen.

Rusiye hökümiti bu yil 4-aydin bashlap, chet'elliklerning rusiyide erkin soda qilishini chekligen bolup, bu xitay sodigerlirige éghir zerbe bolghan. Netijide, köpligen xitaylar mallirini erzan sétip kétishke mejbur bolghan. Shuning bilen bir waqitta yene rusiye köchmenler idarisi qanunsiz xitay köchmenlirini tutush we chégridin qoghlap chiqirish xizmetlirini téximu kücheytken idi. (Ümidwar)