Xitay - rusiye herbiy manéwirining teyyarliqi pütken

Rusiye da'irilirining peyshenbe küni bildürüshiche, xitay - rusiye qisimlirini asas qilip rusiyining ural rayonida élip bérilidighan shangxey guruhidiki döletlerning "tinchliq elchisi 2007 " namliq herbiy manéwirining teyyarliqi asasen pütüp qalghan.

Rusiye dölet mudapi'e ministiri sérgéy iwanof " tinchliq elchisi 2007" namliq herbiy manéwir 8 - ayning 9 - künidin 17 - künigiche ural rayonining chélyabéniskiy oblastida ötküzülidighanliqini we manéwirning her qaysi basquchlardiki teyyarliq xizmiti pütüp qalghanliqini bildürgen.

Sérgéy iwanof, ilgiri amérikining sherqiy yawropada bashqurulidighan bomba mudapi'e séstimisi orunlashturush pilanini tenqidlep, bu pilan herbiy we istiratégiyilik tengpungluqni buzupla qalmay, rusiyining yawropa ittipaqi hem sh a o e t bilen bolghan bixeterlik hemkarliq munasiwitige dexli yetküzidighanliqini tekitligen idi.

Xitay bolsa amérikining chéx jumhuryitige bashqurulidighan bomba orunlashturush pilanigha anche étibar qilmay kelgen bolsimu, lékin amérikining yaponiye we awstiraliyiler bilen birleshme bashqurulidighan bomba qalqan séstimisi qurushi pilanigha qarshi chiqmaqta.

Aldinqi küni shangxey guruhidiki ellerning dölet mudapi'e ministirliri qirghizistan paytexti bishkekke yighilip, bu qétimqi manéwirni muzakire qildi we manéwir toghrisida kélishim imzalidi. Qirghizistan dölet mudapi'e isma'il isaqof, manéwir heqqidiki kélishim shangxey guruhidiki döletlerning herbiy hemkarliqi küchiyiwatqanliqini ispatlaydighan muhim höjjet, dep körsetti.

Xitay metbu'atlirining xewirige qarighanda, xitay bu qétimqi manéwirgha 1500 kishilik herbiy qoshun qatnashturmaqchi iken. (Erkin)