Русийә - хитай содиси русийигә пайдисиз болмақта


2007-12-30
Share

2007 - Йили русийә билән хитай арисидики содида тәңпуңсизлиқ көрүлгән болуп, гәрчә икки дөләт сода миқдари ашқан болсиму, лекин бир қисим саһәләр бойичә хитай көзлигән мәқситигә йетәлмигән.

Русийә агентлиқлириниң хәвәр қилишичә, русийә -хитай иқтисадий һәмкарлиқлири мутәхәссислири бу йилқи икки дөләт содисини хуласилап, 2007- йили русийә билән хитайниң енергийә содисида хитайниң көзлигән мәқситигә йетәлмигәнлики, енергийә содиси йәни русийиниң хитайға сатқан нефитлириниң миқдариниң өткән йилидикидин көп төвәнләп кәткәнликини билдүргән. Бирақ, русийиниң нефит содиси өткән йилидин ашқан болуп, у асаслиқ нефитлирини хитайдин башқа дөләтләргә експорт қилған.

Германийә русийиниң биринчи сода шерики болуп, хитай голландийидин қалса үчинчи шерикидур. Русийә хитай карханичилар җәмийитиниң башлиқи китофниң ейтишичә, нөвәттә, русийә-хитай содиси русийигә пайдисиз йөнилишкә қарап маңған. У " икки дөләт содисиниң миқдари ешиватқан болсиму, лекин русийиниң енергийә мәһсулатлири вә хам әшялириниң хитайниң һәр хил таварлириға алмаштуруш һалитигә қалғанлиқини тәкитләп, буниң әмәлийәттә русийә үчүн яхши әһвал әмәсликини көрсәткән.

Русийә йирақ шәрқ институтиниң тәтқиқатчиси порзһаковниң қаришичә, хитай 2007- йили русийигә өзиниң техника мәһсулатлириниң сетишни ашурған болуп, буларниң ичидә аилә електир сайманлири вә аптомобиллар болған. Униңдин башқа йәнә алтун буюмларниң екиспортини ашурған. Бу русийиниң рәңлик метал содиси үчүн риқабәт пәйда қилған. Порзһаков, һазир русийә-хитай содисида русийә үчүн пайдисиз вәзийәт шәкилләнгәнликини, бирақ буниң икки дөләт мунасивәтлиригә тәсир йәткүзәлмәйдиғанлиқини әскәрткән.

Бирақ, русийә хитайға сатидиған нефит миқдарини 2007 - йили азлатқан. Шундақла хитайму бу йил русийидин алдиған електирни тохтатқан. Улар арисидики тәбиий газ сода баһаси сөһбитидә илгириләш болмиған. Бу йил йәнә русийә тәбиий газ ширкитиниң қарши туруши билән хитай сахалин арилиниң тәбиий газлирини сетивелиштин мәһрум қалған. (Үмидвар)

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт