رۇسىيە كۆچمەنلەر ئىدارىسىنىڭ يۇقىرى دەرىجىلىك ئەمەلدارى، رۇسىيە ھۆكۈمىتىنىڭ خىتاي ۋە باشقا دۆلەت كۆچمەنلىرىنىڭ رۇسىيىدە خىتاي كوچىسىغا ئوخشاش كۆچمەنلەر رايونى تەسىس قىلىشىغا قەتئىي يول قويمايدىغانلىقىنى بىلدۈردى. مۇتەخەسىسلەرنىڭ بىلدۈرۈشىچە، گەرچە نۆۋەتتە رۇسىيە بىلەن خىتاينىڭ سىياسىي مۇناسىۋىتى ئالاھىدە يېقىن بولسىمۇ، بىراق خىتاي كۆچمەنلىرى مەسىلىسى رۇسىيە ھەر قايسى ساھەسىنىڭ كۈچلۈك دىققىتىنى قوزغىماقتا ئىكەن.
رۇسىيە كۆچمەنلەر ئىدارىسىنىڭ مەسئۇلى رومودوۋىنىسكى يېقىندا رۇسىيە مەتبۇئاتلىرىغا، رۇسىيە ھۆكۈمىتىنىڭ خىتايلارغا رۇسىيە شەھەرلىرىدە مەخسۇس خىتاي بازىرى ۋە كوچىسىغا ئوخشاش مىللىي تۈس ئالغان كۆچمەنلەر رايونى بەرپا قىلىشىغا يول قويمايدىغانلىقىنى ئالاھىدە ئوتتۇرىغا قويغان.
مەزكۈر خادىم، خىتاي كۆچمەنلىرىنىڭ رۇسىيىدە نۇرغۇنلىغان قالايمىقانچىلىقلارنى پەيدا قىلغانلىقىنى تەكىتلەش بىلەن بىرگە، خىتايلارنىڭ ساياھەت سالاھىيىتىنى قوللىنىش ئارقىلىق، رۇسىيىنى ئۆزلىرىنىڭ ياۋرۇپا دۆلەتلىرىگە قانۇنسىز كۆچمەن يۆتكەش كۆۋرۈكى قىلىۋالغانلىقىنى ئاشكارىلىغان.
بىر قىسىم خىتايلار ساياھەت قىلىش باھانىسىدە ھەر قايسى دۆلەتلەرگە بېرىپ، شۇ دۆلەتلەردە قانۇنسىز ئەمگەك قىلىش، بولۇپمۇ قانۇنسىز ئادەم يۆتكەش قىلمىشلىرى بىلەن شۇغۇللىنىپ كەلمەكتە. يېقىندا ئامېرىكىنىڭ نيۇيورك شەھىرىدىكى خىتاي كوچىسىدا قىممىتى 60 مىليون دوللارلىق ساختا مال ئاشكارىلانغان بولۇپ، مەزكۈر خىتاي كوچىسى ئامېرىكىدىكى قانۇنسىزلىق جىنايىتى ئەڭ كۆپ يۈز بېرىدىغان رايونلارنىڭ بىرى ھېسابلىنىدۇ. (ئەقىدە)