Saddam hüseyin irqiy tazilash jinayiti bilen eyiblinishke duch keldi

Iraqning sabiq prézidénti saddam hüseyin iraq sot mehkimisi teripidin 1980 - yillarda kürdlerge qarshi irqiy tazilash élip bérish jinayiti bilen eyiblendi. Saddam hüseyin we uning sabiq iraq hökümitidiki 6 emeldari, kürdlerge qarshi anfal herikiti, dep atalghan basturush élip bérish we helepchide kürd puqralirigha zeherlik gaz ishlitish qatarliq yéngi jinayetler bilen eyiblenmekte.

Kishilik hoquq teshkilatlirining ilgiri sürüshiche, anfal herikiti jeryanida 180 ming kishi ölgen. Saddam hüseyin we uning ademliri buningdin ilgiri u 1982 - yili saddam hüseyin'ge süyqest qilish weqesi meghlup bolghandin kéyin duja'il yézisida 148 kishini öltürüsh bilen jawapkarliqqa tartilghan.

B b s ning tekitlishiche, anfal herikiti saddam hüseyin hökümitining kürdlerge qarshi élip barghan eng chong jinayetlirining biri iken. Sot mehkimisining bayanatchisi ra'id juhi, "nechche minglighan er we ayallarning öltürülüshini keltürüp chiqarghan anfal herikiti üstidin élip barghan tekshürüsh axirlashqanliqini we eyibnamining sot mehkimisige tapshurulghanliqini" bildürdi.

Saddam hüseyin bilen birge eyiblen'genler ichide uning ximiyilik eli, dep atalghan newre qérindishi ali hesen el - mejid bar. U, 1988 - yili helepche rayonidiki kürdlerler zeherlik gaz ishlitish we 5000 kürd puqrasining ölüshini keltürüp chiqirish bilen eyiblenmekte. Eyni chaghda xitay hökümiti saddam hüseyinning kürd we shi'elerge qarshi élip barghan basturush herikitini iraqning ichki ishi, dep jakarlighan. (Erkin)