Хәлқара сақчи тәшкилати садам һүсәйинниң чоң қизи рағәтни тутуш буйруқи чиқарди


2007.08.17
Share on WhatsApp
Share on WhatsApp

Хәлқара сақчи тәшкилати ирақниң сабиқ президенти садам һүсәйинниң чоң қизи рағәтни тутуш буйруқи чиқирип, уни терроризмға четилған, дәп әйиблиди. Бу йил 40 яшларға кирип қалған рағәт, садам һүсәйинниң тунҗи аяли саҗидәдин туғулған тунҗи пәрзәнтидур.

У, америка армийиси бағдадни ишғал қилғандин кейин, иорданийидә қечип берип шу җайда панаһланған. 2006 - Йили ирақ һөкүмити рағәт вә униң аниси саҗидә үстидин тутуш буйруқи чиқирип, уларни ирақтики исянчи күчләрни қоллимақта, дәп әйиблигән. Ирақ ички ишлар министирликиниң әскәртишичә, хәлқара сақчи тәшкилати җүмә күни һәр қайси әза дөләтләргә рағәтни тутуш тоғрисида рәсми уқтуруш тарқатқан.

Рағәт, садам һүсәйин өлүм җазасиға һөкүм қилинғандин кейин, бир мәзгил адвокатларни тәшкилләп дадисини ақлимақчи болди. Лекин садам һүсәйин өткән йили 12 айда дарға есилғандин кейин, у садам һүсәйинниң мейитини таки америкилиқлар ирақтин қоғлап чиқирилғанға қәдәр вақтинчә йәмәнгә көмүшни тәләп қилған. Иорданийә даирилириниң билдүрүшичә, рағәт, иорданийидә мусапир сүпитидә туриватқан болсиму, лекин улар рағәтниң йеқиндин бериқи из дерикини билмәйдикән. Садам һүсәйинниң тунҗи аяли саҗидәдин рағәт, рәна, халан, одай вә кусай, дәйдиған 5 пәрзәнти бар иди. Пәрзәнтлиридин удай билән кусай, америка армийиси ираққа киргәндин кейин, мусул әтрапидики бир тоқунушта америка қисимлири тәрипидин өлтүрүлгән. (Әркин)

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.