Xelq'ara sot yuqiri derijilik sérbiye emeldarlirini sotlashqa bashlidi

Gollandiyining ga'aga shehiridiki b d t urush jinayetchiler sot mehkimisi düshenbe küni 6 neper yuqiri derijilik sérbiye siyasiy we herbiy emeldarini sotlashqa bashlidi. Bu 6 emeldarning hemmisi sabiq yugusilawiye prézidénti slibodan milushiwéchning yéqinliri bolup, 1998 we 1999 - yilliri kosowaliq albanlarni basturush herikiti jeryanida urush jinayiti sadir qilghan, dep eyiblenmekte.

Milushiwéch bu yil 3 - ayda ga'agadiki b d t urush jinayetchiler sot mehkimisining solaqxanisida yürek késili bilen ölüshtin burun oxshash jinayet bilen eyiblen'gen. Bu 6 emeldar ichide sérbiyining sabiq prézidénti mradinowéch we yugusilawiye armiyisining sabiq shtab bashliqi qatarliq yuqiri derijilik siyasiy we herbiy emeldarlar bar.

Xelq'ara mehkimisining teptishi düshenbe küni sotning bashlinishigha bu kishiler milushiwéch bilen til biriktürüsh, albanlarni yurt makanidin qoghlap chiqirip sérbiyining kosowadiki kontrolluqini emelge ashurmaqchi bolghan, dep eyiblidi. Teptish emeldari ularni yene, sérbiye armiyisining albanlar üstidin élip barghan zorawanliqigha köz yümüsh bilen eyibligen.

Lékin ular teptish da'irilirining eyiblishini ret qilip, özlirini gunahsiz, dep jakarlidi. Junggo kosowa urushi mezgilide sh a e t ning sérbiyige qarshi herbiy heriket élip bérishigha qarshi chiqqan we milushiwéchning albanlargha qarshi herikitini qollap sh a e t ning herbiy herikitidin qattiq bi'aram bolghan idi. (Erkin)