Серблар америкиниң белградтики баш әлчиханисиға от қойди

Косова мустәқиллиқиға чидимиған серблар пәйшәнбә күни пайтәхт белградта йиғилиш өткүзүп, америкиниң белградтики баш әлчиханисиниң қисмән җайлириға от қоювәтти. Хәвәрләрдә америка әлчиханисиниң тақалғанлиқини вә муһапизәтсиз қалғанлиқини билдүрмәктә. Бу җәрянда серблар йәнә әнгилийә вә кродийиләрниң белградтики әлчиханилириға һуҗум қилди.

Серблар америка әлчиханисиға һуҗум қилиштин бурун, сербийә парламенти алдида 150 миң кишилик йиғилиш өткүзүп, косова мустәқиллиқиға қарши турған. Сербийә баш министири ваҗислав костинитса парламент алдидики намайишчиларға сөз қилип, косова мәңгү сербийиниң болиду, дәп тәкитлигән.

Америка, әнгилийә, италийә вә германийиләр косова мустәқиллиқини әң бурун етирап қилған дөләтләрдур. Америка ташқи ишлар министирлиқи баянатчиси шон маккормак, бир түркүм сербларниң америка әлчиханисиға бесип киргәнликини билдүрди вә сербийә даирилириниң вәзийәтни контрол қилишини тәләп қилди. Америкиниң б д т дики баш әлчиси залмай хелилзад болса б д т хәвпсизлик кеңишини сербийини әйиблишини тәләп қилди. Косованиң сербийә билән чегрилинидиған бәзи еғизларда серблар, ш а о ә т ниң косова чегрисини қоғдаватқан әскәрлиригә таш атқан вә косова чегрисиға кирмәкчи болған. Лекин хәвәрләрдә һазир чегридики вәзийәтниң тинчланғанлиқини билдүрди.

Хитай косова мустәқиллиқиға қарши чиққан дөләтләрниң бири болуп, баянатчи лю җйәнчав бу вәқәниң хитайда " чоңқур әндишә " қозғаватқанлиқини илгири сүргән. Хитай һөкүмитиниң мәйдани хитай мәтбуатлириниң бу һәқтики хәвәрлиридә әкс әтмәктә. Шинҗаң хәлқ радио истансиси бу һәқтики хәвиридә сербийиликләр дөләтниң земин пүтүнлики үчүн күрәш қиливатқанлиқини илгири сүрди. Анализчилар, хитайниң косова мустәқиллиқи шәрқий түркистан вә тибәт мустәқиллиқи үчүн үлгә болуп қалиду яки уларниң давасини қанунлаштуруп қойиду, дәп әнсирәйдиғанлиқини билдүрмәктә. (Әркин)