Se'udi padishahi abdulla xitaydiki ziyaritini axirlashturdi


2006-01-24
Share

Se'udi erebistan padishahi abdulla xitaygha qilghan tarixiy xaraktérlik ziyariti jeryanida, béyjing da'iriliri bilen énérgiye hemkarliq kélishimi imzalighandin kéyin, seyshenbe küni ziyaritini axirlashturup béyjingdin ayrildi.

Padishah abdulla seyshenbe küni xitay bash ministiri wén jyabaw bilen körüshkendin kéyin, béyjingdin ayrilip hindistan'gha yürüp ketken. Fransiye axbarat agéntliqining xewer qilishiche, abdulla wén jyabawgha se'udi erebistan xitayni " heqiqi dost dölet" dep qaraydu dep tekitligen we xitay - se'udi munaswitining siyasi , iqtisadi sehelerde " téximu yaxshi" bolup kétishini ümid qilghan.

Padishah abdulla düshenbe küni xelq sariyida uchrashqanda, ikki dölet emeldarliri néfit, teb'iy gaz, kan bayliqliri we meblegh sélish türliri boyiche bir qatar kélishimler imzalidi. Shinxu'a axbarat agéntliqining xewer qilishiche, wén jyabaw se'udi padishahigha " her ikkila terep pursetni ching tutup, hemkarliqni kéngeytish we ortaq tereqqiyat nishanigha yétish kérek " deydu.

Wén jyabaw, se'udi erebistan, ereb birleshme xelipiliki, behreyn, qatar we omman qatarliq paris qoltuqi hemkarliq komitétidiki döletler bilen erkin soda kélishimi imzalash qedimini tézlitidighanliqini bildürgen. Bu se'udi erebistan padishahining xitay - se'udi erebistan diplomatik munasiwet ornatqandin béri xitayni tunji qétim ziyaret qilishidur. Xitay tashqiy ishlar ministirliqi bayanatchisi kung chüenning sözi boyiche, ularning söhbiti énérgiye mesilisi bilen birge herbiy alaqe we térrorluq qatarliq témilargha chétilghan bolushi mümkin. (Erkin)

Pikirler (0)

Barliq pikir - bayanlarni körüsh.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet