Shangxey hemkarliq teshkilati zeherlik chikimlik sodisigha zerbe bermekchi

• 
  2006-06-12

Shangxey hemkarliq teshkilati dölet we hökümet bashliqlar yéghinigha sahipxanliq qilish üchün teyyarliniwatqan xitay hökümiti, düshenbe küni ottura asiya döletlirining zeherlik chékimlikning afghanistandin kérishining aldini élish üchün, bir qoghdinish sistémisi qurushni pilanlawatqanliqini bildürdi.

Xitay tashqi ishlar yardemchisi minstiri li xuy béyjingda ötküzgen muxbirlarni kütüwilish yéghinida, asasen afghanistandin kéliwatqan zeherlik chékimlik, ottura asiyaning ijtima'iy muqimliqigha hemde rayonning bixeterlikige tehdit qiliwatidu. Afghanistan térrorchiliq we diniy esebiylikni meblegh bilen teminlewatqan eng muhim menbelerning béri hésablinidu, dédi.

Shangxey hemkarliq teshkilatigha eza bolghan xitay, rusiye, qazaqistan, qirghizistan, tajikistan we üzbékistanning dölet bashliqliri, 15‏-iyun küni shangxeyde uchriship, qurulghanliqigha besh yil bolghan shangxey hemkarliq teshkilatining kilechek pilanliri üstide söhbetlishidu.

Siyasiy mulahizichilerning bildürüshiche, shangxey hemkarliq teshkilati dölet bashliqiliri, bundin burunqi aliy derijilik uchrishishilardikige oxshash , asasen bixeterlik mesililirini muzakire qili'idu. Emma yéngi xewerlerge asaslan'ghanda, zeherlik chékimlik we eydiz qatarliq mesililer bu qétimqi uchrishishning muhim témilirini teshkilleydiken. (Qanat)