Шаңхәй һәмкарлиқ тәшкилати рәһбәрлири " тинчлиқ бурчи2007 " һәрбий маневирини көздин кәчүрди


2007.08.17

Шаңхәй һәмкарлиқ тәшкилатидики дөләтләр рәһбәрлири пәйшәнбә күни бишкәктики бир күнлүк йиғинини ахирлаштурғандин кейин, җүмә күни русийиниң челябински райониға келип, бу җайда өткүзүлүватқан " тинчлиқ бурчи 2007," намлиқ һәрбий маневирни көздин кәчүрди. Бу маневир асаслиқи хитай вә русийә қисимлири тәрипидин елип берилған болсиму, лекин шаңхәй һәмкарлиқ гуруһидики дөләтләр бир қәдәр тәлтөкүс һазир болған маневирларниң бири болуп һесаблиниду.

Русийә президенти владимир путин, хитай дөләт рәиси ху җинтав вә оттура асиядики 4 сабиқ совет иттипақи җумһурийитиниң рәһбәрлири җүмә күни танка, броневик, айропилан вә тик учар һәм пиядә қисимлар болуп 6 миң кишилик қошунниң һәрбий маневирини көрди. Маневирниң мәзмуни мәлум бир дөләттики аталмиш қораллар террорчилар, йәнә бир дөләтниң шималидики чегра районларда паалийәт елип баридиған хәлқара террорчи күчләр билән бирлишип, йәрлик хәлқни һөкүмәткә қарши күшкүртүш вәқәсидә, бирләшмә қисимларниң аталмиш террорчиларға зәрбә бериш һәркитини тема қилған.

Маневирға қатнишиватқан тәрәпләр һазирғичә маневирда кимгә һәйвә көрсәтмәкчи болуватқанлиқини ашкарә тилға алмиған болсиму, лекин бәзи анализчилар маневирниң мәзмуни юқири дәриҗилик бир хитай әмәлдариниң йеқинда шәрқий түркистан террорчи күчлири җуңго чегриси вә униң әтрапидики районларда паалийәт елип бармақта, дегән сөзлири билән бирдәклики барлиқини билдүрмәктә. Шаңхәй гуруһидики дөләтләр рәһбәрлири чилябинскийдики маневирни көздин кәчүрүштин бир күн бурун қирғизистанда қошма ахбарат елан қилип, америкини оттура асия районидин йирақ турушқа агаһландурди. (Әркин)

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.