Shangxey hemkarliqining herbiy manéwirgha teyyarliq qilinmaqta

13- Iyul küni xitay tashqi ishlar ministiri yang ji'échi moskwani ziyaret qilip, rusiyilik kesipdéshi bilen ikki dölet istratégiyilik hemkarliq munasiwetlirini muzakire qildi. Xitay tashqi ishlar ministiri yene rusiye prézidénti putinning qobul qilishigha érishkende , putin rusiyining xitay bilen bolghan munasiwetke yuqiri derijide ehmiyet bériwatqanliqini shuningdek özining bishkekte xitay re'isi xu jintaw bilen körüshüshni kütüwatqanliqini bildürdi.

Xewerlerdin qarighanda, 14- iyul küni putin "yawropa uzun muddetlik qoralliq küchlerni orunlashturushni cheklesh kélishimi" din chiqip kétish buyruqi élan qilghan bolup, bu natoning sherqqe kéngiyishi we amérikining sherqiy yawropa rakétadin mudapi'e körüsh sistémisi ornitish pilanigha bérilgen jawab hésablinidiken, bu xelq'arada zor ghulghula qozghighan.

Xitayning shinxu'a agéntliqining ashkarilishiche, shangxey hemkarliq teshkilatigha eza döletlerning birleshme herbiy manéwirigha qatnishidighan xitay qoshunlirining bir qisimi iyulning 27-si rusiyidiki manéwir rayonigha yétip kélidu, xitay 1600 neperdin artuq eskirini manéwirgha qatnashturidu. Bu qétimqi manéwirgha rusiye, xitay, qazaqistan qatarliq 6 dölet öz qoshunlirini qatnashturushqa, manéwirni ikkige bölüp, yeni rusiyining chélibiyansk rayoni bilen Uyghur aptonom rayonining merkizi ürümchide élip bérishqa pütüshülgen. Ürümchi tunji qétim shangxey hemkarliqining birleshme manéwir qilish nuqtisi qilip tallan'ghan bolup, buningdin ikki yil ilgiri ilidimu manéwir ötküzülgen idi.

Bu, xitay da'irilirining Uyghur élide musteqilliq heriketlirining mewjut ikenlikini étirap qilishi bilen munasiwetlik iken. Rusiye-xitay jümlidin shangxey hemkarliq teshkilatining "tinchliq elchisi 2007" namliq manéwiri rusiye -amérika munasiwetliri jümlidin rusiyining shimaliy atlantik okyan ehdi teshkilati bilen bolghan munasiwetliri murekkepleshken waqitqa toghra kelgen bolup, xitay bilen rusiye özara hemkarliqni kücheytish arqiliq , gherbke taqabil turushta bir-biridin paydilinish taktikisi qollan'ghan.(Ümidwar)