Shangxey hemkarliq teshkilati démokratiyining kéngiyishige tosqunluq qilmaqta


2006.09.28

Amérika dölet mejlisi kéngesh palatasida ötküzülgen guwahliqtin ötüsh yéghinida, shangxey hemkarliq teshkilatining démokratiyining ottura asiyada kéngiyishige tosqunluq qiliwatqanliqi bildürüldi.

9‏-Ayning 26‏- küni amérika kéngesh palatasida, amérika hélsinki komitéti teripidin uyushturulghan yéghinda, shangxey hemkarliq teshkilatining, amérika üchün istratégiyilik, siyasiy we iqtisadiy jehettin ehmiyiti künséri köpiyiwatqan ottura asiyadiki tesiri muhakime qilin'ghan.

Yéghin'gha qatnashqan amérika tashqi ishlar ministirining jenubiy asiya we ottura asiya ishlirigha mes'ul yardemchisi richard bawcher, térrorchiliqqa qarshi turush, chégra bixeterliki, siyasiy, iqtisadiy we énérgiye mesililiride hemkarliqini özining asasliq nishani qilip békitken shangxey hemkarliq teshkilati, özining roli we meqsetlirini qandaq we qaysi yol bilen emelge ashurudighanliqini ochuq- ashkara bayan qilishi kérek, dédi.

Yighinda söz qilghan, karnigi tetqiqat merkizining mutexessisi doktor alkot, xitay we rusiyining shangxey hemkarliq teshkilatining siyasitini belgilewatqan ikki dölet ikenlikini tekitlep, xitay hökümitining hetta Uyghurlar mesiliside ottura asiya döletlirining ichki ishlirigha arilishiwatqanliqini, ottura asiyadiki Uyghurlarning, Uyghur élidiki xitay hökümitige qarshi heriketlerni qollimasliqi üchün, ottura asiya döletlirige bésim ishlitiwatqanliqini bildürdi.

Yighinda söz qilghan mutexessisler, shangxey hemkarliqi teshkilatining, démokratiyini kéngeytish herikitige qarshi chiqip, kishilik hoquq mesilisini her bir döletning ichki ishi déyish arqiliq, démokratiye we kishilik hoquqqa qarshi hemde rayonda amérika we gherbning menpe'etlirige tehdit qilidighan bir teshkilat bolup otturigha chiqqanliqini bildürdi. (Qanat)

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.