Amérika shangxey guruhining yighinigha inkas qayturdi

Amérika tashqiy ishlar ministirliqi peyshenbe küni shangxey guruhi bashliqlar yighini heqqide toxtulup, amérika shangxey guruhining bezi ijabiy nishanlirini qarshi alsimu, lékin bu organning amérikidin qoshun chékindürüshni telep qilish pilanini qollimaydu we iran prézidéntining yighin'gha teklip qilin'ghanliqigha qarshi turidu, dédi.

Amérika tashqiy ishlar ministirliqi bayanatchisi mekkormakning eskertishiche, amérika shangxey guruhi otturigha qoyghan soda, rayon hemkarliqi, térrorluq we zeherlik chékimlikke qarshi turush nishanini qollisimu, lékin shangxey guruhining bezi heriketlirini qollimaydiken. U, " chünki bu heriketler mezkur organ otturigha qoyghan nishanlargha xilap" deydu.

Shangxey guruhi 2005 - yili astana yighinida amérikini afghanistan we ottura asiyadin qoshun chékindürüshke chaqirghan. Mekkormak, "bu xil telep rayondiki térrorluqqa qarshi küreshke uyghun kelmeydu " dep körsetti. Shangxey guruhi bu yil amérikini ottura asiyadin qoshun chékindürüshke chaqirmighan bolsimu, lékin astana xitabnamisining küchke ige ikenlikini tekitligen.

Mekkormakning eskertishiche, shangxey guruhining iranni közetküchi dölet süpitide yighin'gha teklip qilghanliqi rayonning térrorluqqa qarshi turush rohigha uyghun kelmeydiken. U, " iran dunya boyiche térrorchiliqqa yardem béridighan eng chong yaki eng asasliq dölet" deydu. Iran prézidénti exmedinijad peyshenbe küni yighinda amérikini ima qilip, shangxey guruhidiki döletler hemkarliqini kücheytish " zorawan küchlerning tehditidin qoghdinishqa" yardemchi bolidu, dep tekitligen. ( Erkin)