Shimaliy koriye yadro programmisini toxtitishta amérikigha shert qoydi

Charshenbe küni shimaliy koriye yadro mesilisidiki 6 dölet söhbiti ikkinchi kün'ge qedem qoyghan mezgilde, shimaliy koriye amérikigha shert qoyup, eger amérika koriye yérim arilidin yadro qorallirini élip chiqip ketse, u halda shimaliy koriyining yadro programma tereqqiyatini toxtitidighanliqini bildürdi.

Shimaliy koriye terepning bu shertlirini söhbettiki shimaliy koriye wekili mu'awin tashqi ishlar ministiri ki kyé gwan otturigha qoyghan bolup, u yene, amérikining shimaliy koriye kommunistik hakimiyitini örüwétish meqsitidin waz kéchip, tinch halda ortaq mewjut bolup turush méxanizimini berpa qilishini telep qildi.

Emma buninggha qarita amérika we jenubiy koriye wekilliri birlikte amérikining alliburunla shimaliy koriyige qaratqan yadro qorallirini élip chiqip ketkenlikini, shunga bu yerde hazir amérikining héchqandaq yadro qorallirining mewjut emeslikini tekitlidi.

Washin'gton da'iriliri shimaliy koriyining ezeldin yadro programmisini toxtitish üchün aldinqi shert qoyiwalidighanliqini eyiblidi. Amérika tashqi ishlar ministirliqining yardemchi ministiri kristofér xil "ular (shimaliy koriye) ezeldin bashqilardin burun mejburiyetni üstige élishni xalimaydu" dep bildürdi.

U yene, amérikining ezeldin shimaliy koriyege hujum qilish bilen mesilini hel qilishni meqset qilmighanliqini eskertti. U sözide "shimaliy koriye menggülük, pütünley we ispatliq halda özlirining yadro programmisini toxtatsila, amérika we bashqa döletler choqum shimaliy koriyining sözi we emeliy herikitige asasen tégishlik yol tutidu" dédi. (Peride)