Shimaliy koriye yadro qorallar pilanidin waz kechkenlikini jakarlidi

Shimaliy koriye yadro qorallar mesilisi boyiche béyjingda söhbet élip barghan 6 dölet düshenbe küni birleshme axbarat élan qilip, shimaliy koriyining yadro qorallar pilanidin waz kechkenlikini jakarlidi. Shuning bilen birge amérika, shimaliy koriyige hujum qilish niyiti yoqluqigha wede qilghan. Amérika söhbet wekili kristofir xill söhbettiki ilgirilesh toghrisida " hemmimizni menpe'etdar qilidighan kélishim," dep körsetti.

Roytérs axbarat agéntliqining xewer qilishiche, shimaliy koriye 6 dölet birleshme axbaratida, yadro qorallar we yadro qorallar pilanidin waz kéchip, "xelq'ara yadro qorallarni cheklesh shertnamisi" gha qaytip kélidighanliqini we xelq'ara atom énérgiye idarisining shimaliy koriye yadro esliheliri üstidin tekshürüsh élip bérishigha yol qoyushni qobul qilghan. Emma shimaliy koriye yadro énérgiyisidin tinch meqsetler üchün paydilinish hoquqini saqlap qalidighanliqini tekitlidi. Terepler, bu mesile toghrisida kéyinrek qayta söhbet élip bérishke qoshulghan.

Amérika, shimaliy koriyige muntizim yaki yadro qorallar bilen hujum qilmaydighanliqini wede qilish bilen birge, koriye yérim arilida yadro qoralliri yoqliqini bildürgen. Shuning bilen birge amérika, rusiye, xitay, jenubiy koriye we yaponiyiler shimaliy koriyini énérgiye bilen teminleshke qoshuldi. (Erkin)