Amérikining shimaliy koriye yadro qoralliri mesilisini bir terep qilish diplomatiyisi izchil dawamlashmaqta

Jenubiy koriyide ziyarette boluwatqan, amérika tashqi ishlar minisitiri kondiliza rayis peyshenbe küni":eger shimaliy koriye yene qayta yadro siniqi élip barsa, mezkür dölet téximu köp éghir aqiwetlerge duch kélidu" dédi.

Xitay dölet re'isi xu jintawning alahide wekili, dölet komissari tang jashüen charshenbe küni, shimaliy koriyining paytexti pyongyanggha yétip kélip, shimaliy koriye rehbiri kim jong'il bilen körüshüp, xitay we shimaliy koriye munasiwiti shuningdek koriye yérim arilining jiddiy weziyiti üstide pikir almashturdi.

Bu arida amérika birleshme agéntliqi, amérika hökümet xadimining sözini neqil keltürüp": xu jintaw choqum wekili arqiliq, kim jong'ilgha éniq we qattiq pozitsiyisini yetküzüp, shimaliy koriyining qayta yadro siniqi élip barmasliqini tewisiye qilidu" dédi.

Kondiliza rayisining bu qétim asiya döletliride élip bériwatqan ziyaritining asasliq meqsidi, shimaliy koriyge bérilgen" imbargo" ning netijisini qolgha keltürüshtin ibaret bolup, amérika terep yene, jenubiy koriyidin, shimaliy koriyining paraxotlirini tekshürüsh xizmitige birlikte qatnishishni teshebbüs qildi, biraq jenubiy koriye buning shimaliy koriye bilen toqunush hasil qilishigha seweb bolup qélishidin endishe qiliwatqanliqini bildürmekte.

Kondiliza rayis, jenubiy koriyige kélishtin burun yaponiye tashqi ishlar ministiri taro asu bilen alahide söhbet ötküzup, amérika ‏- yaponiye ikki terepning bu mesilide ortaq tirishchanliq körsitidighanliqi heqqide wedileshken idi. (Eqide)