Sérbiyide prézidént saylimi ötküzüldi

Yekshenbe küni balqan yérim arilidiki sérbiye jumhuriyitide prézidént saylimi ötküzüldi.

Bu qétimqi saylam ikkinchi qétimliq prézidént saylimi bolup, buningda sérbiye milletchilik pikir éqimidiki partiyidin kélip chiqqan prézidént namzati bilen gherbperes partiye namzati arisida riqabet bolidu. Rusiye bilen yéqin ötüp, gherbke taqabil turush pikrini teshebbus qilidighan radikal partiye rehbiri tomislaw nikolich. Gherbperes siyaset yürgüzüwatqan démokratik partiyidin kélip chiqqan prézidént boris tadichqa riqabet peyda qilghan.

B b s agéntliqining xewirige asaslan'ghanda, ikki hepte ilgiri élip bérilghan saylamda nikolich ghelibe qilghan idi. Eger u bügünki hel qilghuch saylamda ghelibe qilsa, sérbiye jumhuriyitining prézidénti bolup, hakimiyet tapshuruwalidu hemde gherbke bolghan yumshaq pozitsiyisini özgertishi mumkin iken. Nöwette, her ikkilisining saylamda tengliship qéliwatqanliqi bildürülgen.

Sérbiyining bu qétimqi prézidént saylimi kosowaning musteqilliqi mesilisi, sérbiyining yawropa ittipaqi we amérika bilen bolghan munasiwetlirige baghlinishliq bolup, her ikkila namzat kosowa musteqilliqighe qarshi turghan bolsimu, lékin ularning gherb démokratiyisi hemde gherb bilen bolghan munasiwet mesilisidiki qarishi perqliqtur. Hazir hakimiyet yürgüzüwatqan boris tadich bolsa, sérbiyini yawropa ittipaqining terkibige kirgüzüsh üchün heriket qilghan bolup, öktichi partiyidin bolghan prézidént namzati sérbiyini rusiye bilen ittipaq qilish terepdari hemde kosowagha qattiq pozitsiye tutushni teshebbus qilidu.

Kosowa musteqilliqini amérika we yawropa ittipaqi qollap kelgen bolup, rusiye buninggha qattiq qarshi turmaqta. Nöwette, kosowa b d t teripidin idare qilinmaqta. Kosowa yéqinda musteqilliq jakarlaydighanliqini élan qilghan, buninggha rusiye bilen sérbiyilikler qattiq qarshi turghan idi. (Ümidwar)