Amérika kéngesh palata ezasi béyjingni xitay - amérika soda tengpungliqi toghrisida agahlandurdi

Amérika kéngesh palatasi we kéngesh palata maliye - iqtisad komitétining ezasi maks bawkus seyshenbe küni béyjing da'irilirini agahlandurup, eger xitay , xitay - amérika soda balanisidiki tengpungsizliqni tüzetmisi'e, " washin'gton xitay mallirining amérikigha éksport qilinishini cheklesh yolida tedbir élishi mümkin" dep körsetti.

Fransiye axbarat agéntliqining xewer qilishiche, amérika dölet mejlisining démokratlar partiyisidin bolghan kéngesh palata ezasi chak shumir, yéqinda 2006- yili xitaydin import qilinidighan barliq tawarlardin 27 % baj élish toghrisida qanun teklip layihisi sunup, xitay - amérika soda balanisidiki tengpungsizliqni azaytidighanliqini bildürgen.

Bawkusning eskertishiche, u kéngesh palata ezasi shumirning qanun teklip layihisini qollimisimu, emma kéngesh palatasida shumirning qanun teklip layihisini qollaydighan ezalar xéli köp sanliqni igileydiken.

Bawkus, xitayning amérika xelqi we amérika dölet mejlisige xitay - amérika soda balanisidiki tengpungsizliqni tügitish semimiyiti barliqini ipadilesh mes'uliyiti bar, deydu. Maks bawkusning eskertishiche, u yéqinda xitay soda ministiri bo shiley bilen uchrushup, uninggha amérikining bu mesilidiki qet'iylikini yetküzgen. U, xitay - amérika soda balanisidiki tengpungsizliqni " bu yerde hazir amérikigha jiddiy iqtisadi xeter bar'' dep körsetti. Xitayning 2005 - yili xitay - amérika sodisidiki aktip balanisi 200 milyard dollargha yetken. (Erkin)