Америка ташқи сода доклатида хитайни әйиблиди

Америка сода вәкили ишханиси җүмә күни елан қилған америкиниң ташқий сода доклатида, хитайни америкиниң сода вә мәбләғ селишиға тосалғу яритип, әң чоң мәсилә туғдуриватқан дөләт, дәп әйиблиди.

750 Бәтлик доклатта америка мәбләғ селиш вә ташқи содида дуч келиватқан тосалғулар үстидин баһалаш елип барған. Доклатта әскәртишичә, хитай хәлқара сода қанунлирини бир чәткә қайрип қоюп, кино филими, музика, дора - дәрман, давалаш әсваплири, аптомобил запчаслири , кийим - кечәк вә аяғ кийимлирини кәң - көләмдә төкмә қилип сатмақта. Доклатта, " төкмә қилип сетиш қануни йолдики малларға вә америкиниң хитай базириға киришигә тосалғу яритип, хәлқара базар хитай төкмә експортиниң тәсиригә учриди " дәйду.

Бу доклат елан қилиштин бир күн илгири америка сода вәкили ишханиси баянат елан қилип, хитайниң америка аптомобил запчаслириға таможна беҗи билән охшаш сәвийидә баҗ қойғанлиқини әйиблигән вә явропа иттипақи билән биргә дуня сода тәшкилатиға әрз сунидиғанлиқини җакарлиған иди. Америка хитайниң бу һәрикитини дуня сода тәшкилатиниң низамнамисиға хилап, дәп әйиблимәктә.

Баятта әскәртишичә, америка тәрәп бу мәсилини оттуриға қойған болсиму, лекин һазирғичә хитай тәрәптин қанаәтлинәрлик җаваб алалмиған. Хитай сода министирлиқи болса америка билән явропа иттипақиниң хитайни дуня сода тәшкилатиға әрз қилмақчи болғанлиқидин әпсуслинидиғанлиқини билдүрди. Хитай сода министирлиқи җүмә күни елан қилған баянатида, америка билән явропа иттипақиниң һәрикитидин әпсуслинидиғанлиқимизни билдүримиз вә җуңго алақидар мәсилә үстидә тәкшүрүш елип бериватиду, дәп тәкитлигән. (Әркин)