ئامېرىكا خىتاي ئۈستىدىن دۇنيا سودا تەشكىلاتىغا ئەرىز سۇنىدۇ
2007.07.13
ئامېرىكا سودا ۋەكىلى سۇزان شىۋاب، ئامېرىكىنىڭ خىتاي - ئامېرىكا ئارىسىدىكى خىتاينىڭ ئېكسپورت تاۋارلىرىغا قوشۇمچە ياردەم پۇلى بېرىش مەسىلىسىنى چۆرىدىگەن تالاش - تارتىشلارغا دۇنيا سودا تەشكىلاتىنىڭ كېسىم چىقىرىشىنى تەلەپ قىلماقچى بولۇۋاتقانلىقىنى ئېلان قىلدى.
ئامېرىكا سودا ۋەكىلى ئىشخانىسىنىڭ باياناتىدا ئەسكەرتىشىچە، خىتاي دۇنيا سودا تەشكىلاتىغا كىرىشتە ئېكسپورت مەھسۇلاتلىرىغا قوشۇمچە ياردەم پۇلى بېرىشنى بىكار قىلىشقا ۋەدە بەرگەن بولسىمۇ، لېكىن ئامېرىكا ھازىرغىچە خىتاينىڭ بۇ ۋەدىسىنى ئەمەلگە ئاشۇرغانلىقىنى كۆرۈپ يىتەلمىگەن.
ئامېرىكا بۇ يىل 2 - ئايدا خىتاينى ئېكسپورت كارخانىلىرىغا قوشۇمچە ياردەم پۇلى بېرىش، 4 - ئايدا ئەقلىي مۈلۈك ھوقۇقىغا دەخلى - تەرۇز قىلىش بىلەن ئەيىبلەپ، دۇنيا سودا تەشكىلاتىغا شىكايەت قىلغان ئىدى. گەرچە خىتاي 7- ئاينىڭ 1 - كۈنىدىن باشلاپ ئېكسپورت مەھسۇلاتلىرىغا قوشۇمچە ياردەم پۇلى بېرىشنى توختاتقانلىقىنى جاكارلىغان بولسىمۇ ،لېكىن ئامېرىكا خىتاينىڭ يېڭى تاپاۋەت قانۇنىدا قوشۇمچە ياردەم پۇلى بىلەن تەمىنلەش مەسىلىسى يەنىلا مەۋجۈت، دەپ قارىماقتا.
ئامېرىكا سودا ۋەكىلى ئىشخانىسىنىڭ باياناتىدا، ئامېرىكا يەنىلا خىتاي بىلەن بولغان سودىدىكى ئىختىلاپنى سۆھبەت يولى بىلەن ھەل قىلىشنى ئۈمىد قىلىدۇ، دەپ كۆرسەتتى. دۇنيا سودا تەشكىلاتى ئۆز كۈنتەرتىپىگە ئاساسەن ئامېرىكىنىڭ خىتاي بىلەن بولغان ئىختىلاپى ئۈستىدىن كېسىم چىقىرىش تەلىپىنى 7 - ئاينىڭ 24 - كۈنى چاقىرىلىدىغان يىغىندا مۇزاكىرە قىلىشى مۇمكىن. ئامېرىكا خىتاينى پولات - تۆمۈر، قەغەزچىلىك، ئۇچۇر ئىگىلىكى قاتارلىق سانائەت كارخانىلىرىغا قوشۇمچە ياردەم پۇلى بېرىش، بۇ توۋارلارنىڭ ئېكسپورت باھاسىنى ئەرزانلىتىپ، ئادالەتسىز رىقابەتكە يول ئېچىش بىلەن ئەيىبلىمەكتە. ئامېرىكا تەرەپنىڭ رەسمىي مەلۇماتلىرىغا قارىغاندا خىتاي بىلەن بولغان سودىدا ئامېرىكىنىڭ 2006 - يىلدىكى سودا قىزىل رەقىمى 232 مىليارد دوللارغا يەتكەن. (ئەركىن)
مۇناسىۋەتلىك ماقالىلار
- خىتاي سودا-سانائەت ۋەكىللەر ئۆمىكى تاشكەنتتە پائالىيەت قىلدى
- ئامېرىكا-خىتاي ئىستراتېگىيىلىك سۆھبەتلىرى ئاياغلاشتى
- ئامېرىكا خىتايغا ئىلغار تېخنىك ئېكسپورت ئۈستىدىكى كونتروللۇقىنى كۈچەيتتى
- ئامېرىكا كېڭەش پالاتا ئەزالىرى خىتايغا قارشى قانۇن لايىھىسى سۇندى
- ھىندىستان- ئامېرىكا مۇناسىۋەتلىرىنىڭ كۈنسېرى تەرەققى قىلىشى خىتاينى بىئارام قىلماقتا
- پېتېر پېيس خىتايلارنىڭ ھەربي خىراجىتى جەھەتتە ئوچۇق - ئاشكارا بولۇشى كېرەكلىكىنى تەكىتلىدى
- رۇسىيە خىتاي ماللىرىغا بولغان كونتروللۇقنى كۈچەيتتى
- ياۋروپا ئىتتىپاقى تاشقى ئىشلار مىنستىرلىرى خىتاي تەرەپ ۋەكىللىرى بىلەن ئايرىم ئۇچراشتى
- بېيجىڭ ئامېرىكا ئېلان قىلغان دوكلاتنى "خىتاي تەھدىتى" نى مۇبالىغە قىلىۋەتكەن دەپ ئەيىبلىدى