Amérika xitay üstidin dunya soda teshkilatigha eriz sunidu


2007-07-13
Share

Amérika soda wekili suzan shiwab, amérikining xitay - amérika arisidiki xitayning éksport tawarlirigha qoshumche yardem puli bérish mesilisini chöridigen talash - tartishlargha dunya soda teshkilatining késim chiqirishini telep qilmaqchi boluwatqanliqini élan qildi.

Amérika soda wekili ishxanisining bayanatida eskertishiche, xitay dunya soda teshkilatigha kirishte éksport mehsulatlirigha qoshumche yardem puli bérishni bikar qilishqa wede bergen bolsimu, lékin amérika hazirghiche xitayning bu wedisini emelge ashurghanliqini körüp yitelmigen.

Amérika bu yil 2 - ayda xitayni éksport karxanilirigha qoshumche yardem puli bérish, 4 - ayda eqliy mülük hoquqigha dexli - teruz qilish bilen eyiblep, dunya soda teshkilatigha shikayet qilghan idi. Gerche xitay 7- ayning 1 - künidin bashlap éksport mehsulatlirigha qoshumche yardem puli bérishni toxtatqanliqini jakarlighan bolsimu ,lékin amérika xitayning yéngi tapawet qanunida qoshumche yardem puli bilen teminlesh mesilisi yenila mewjüt, dep qarimaqta.

Amérika soda wekili ishxanisining bayanatida, amérika yenila xitay bilen bolghan sodidiki ixtilapni söhbet yoli bilen hel qilishni ümid qilidu, dep körsetti. Dunya soda teshkilati öz küntertipige asasen amérikining xitay bilen bolghan ixtilapi üstidin késim chiqirish telipini 7 - ayning 24 - küni chaqirilidighan yighinda muzakire qilishi mumkin. Amérika xitayni polat ‏- tömür, qeghezchilik, uchur igiliki qatarliq sana'et karxanilirigha qoshumche yardem puli bérish, bu towarlarning éksport bahasini erzanlitip, adaletsiz riqabetke yol échish bilen eyiblimekte. Amérika terepning resmiy melumatlirigha qarighanda xitay bilen bolghan sodida amérikining 2006 - yildiki soda qizil reqimi 232 milyard dollargha yetken. (Erkin)

Pikirler (0)

Barliq pikir - bayanlarni körüsh.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet