Җуңго билән русийә б д т ниң суданға имбарго қоюшиға қарши чиқти


2006-04-18
Share

Б д т хәвпсизлик кеңишиниң 4 нәпәр судан әмәлдариға саяһәт имбаргоси қоюш пилани хитай билән русийиниң қарши турушиға учриди. Бу 4 нәпәр әмәлдар суданниң дарфур районидики инсанпәрвәрлик кризисидә хәлқара кишилик һоқуқ әһдинамилири вә тинчлиқ мусаписиға бузғунчилиқ қилиш билән әйибләнгән.

Саяһәт имбаргоси хәвпсизлик кеңишиниң 2005 - йили 3 - айда дарфур вәзийити бойичә һазирлиған доклатиға асасән йолға қоюлмақчи иди. Б д т да турушлуқ хитай вәкилиниң әскәртишичә, әнгилийә вә америка тәрипидин оттуриға қоюлған имбарго тәклипиниң вақит саити йетип кәлмигән. Хитайниң б д т да турушлуқ баш әлчиси ваң гуаңя сәйшәнбә күни " җуңго һазир буниң мувапиқ вақти, дәп қаримайду. Чүнки әбуҗадики сөһбәт давам қилмақта. Биз сөһбәтниң илгириләшкә еришишини үмид қилимиз " деди.

Америкиниң б д т да турушлуқ баш әлчиси җон балтонниң әскәртишичә, у хәвпсизлик кеңишидә имбарго мәсилисини музакирә қилишни оттуриға қойған. Америка суданниң дарфур районида 2милйон инсанниң ирқий қирғинчилиққа дуч кәлгәнлики сәвәбидин юрт -маканлирини ташлап қечишқа мәҗбур болғанлиқини илгири сүрмәктә. Лекин судан һөкүмити дарфур районидики әрәб хәлқ әскәрлирини қорал билән тәминлигәнлики вә уларни райондики йәрлик хәлқләрни юрт маканидин қоғлап чиқиришқа илһамландурғанлиқини рәт қилди.

Суданниң дарфур районида йәрлик африқилиқлар билән әрәб күчмәнлири арисида йүз бәргән тоқунуш 3 йилдин бери давам қилмақта. Хәвпсизлик кеңиши тәрипидин саяһәт вә чәтәлдики мал - мүлкини тоңлитиш имбаргоси қоюлмақчи болған 4 нәпәр кишиниң бири судан һөкүмәт әмәлдари, бири хартумпәрәс әрәб хәлқ әскири, қалған икки нәпири хартумпәрәс топилаңчи күчләрниң рәһбири. (Әркин)

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт