Junggo bilen rusiye b d t ning sudan'gha imbargo qoyushigha qarshi chiqti

B d t xewpsizlik kéngishining 4 neper sudan emeldarigha sayahet imbargosi qoyush pilani xitay bilen rusiyining qarshi turushigha uchridi. Bu 4 neper emeldar sudanning darfur rayonidiki insanperwerlik kriziside xelq'ara kishilik hoquq ehdinamiliri we tinchliq musapisigha buzghunchiliq qilish bilen eyiblen'gen.

Sayahet imbargosi xewpsizlik kéngishining 2005 - yili 3 - ayda darfur weziyiti boyiche hazirlighan doklatigha asasen yolgha qoyulmaqchi idi. B d t da turushluq xitay wekilining eskertishiche, en'giliye we amérika teripidin otturigha qoyulghan imbargo teklipining waqit sa'iti yétip kelmigen. Xitayning b d t da turushluq bash elchisi wang gu'angya seyshenbe küni " junggo hazir buning muwapiq waqti, dep qarimaydu. Chünki ebujadiki söhbet dawam qilmaqta. Biz söhbetning ilgirileshke érishishini ümid qilimiz " dédi.

Amérikining b d t da turushluq bash elchisi jon baltonning eskertishiche, u xewpsizlik kéngishide imbargo mesilisini muzakire qilishni otturigha qoyghan. Amérika sudanning darfur rayonida 2milyon insanning irqiy qirghinchiliqqa duch kelgenliki sewebidin yurt -makanlirini tashlap qéchishqa mejbur bolghanliqini ilgiri sürmekte. Lékin sudan hökümiti darfur rayonidiki ereb xelq eskerlirini qoral bilen teminligenliki we ularni rayondiki yerlik xelqlerni yurt makanidin qoghlap chiqirishqa ilhamlandurghanliqini ret qildi.

Sudanning darfur rayonida yerlik afriqiliqlar bilen ereb küchmenliri arisida yüz bergen toqunush 3 yildin béri dawam qilmaqta. Xewpsizlik kéngishi teripidin sayahet we chet'eldiki mal - mülkini tonglitish imbargosi qoyulmaqchi bolghan 4 neper kishining biri sudan hökümet emeldari, biri xartumperes ereb xelq eskiri, qalghan ikki nepiri xartumperes topilangchi küchlerning rehbiri. (Erkin)