Кино чолпини җорҗ клуний хитайни дарфур мәсилисидә һәрикәт қоллинишқа қистиди

Дүшәнбә күни, америка һоллевуд кино чолпини, иҗтимаий паалийәтчи җорҗ клуний, суданниң дарфур районида йүз бериватқан қан төкүлүшни аяғлаштурушта хитайниң бу райондики тәсиридин пайдиланмақ лазимлиқини әмма, хитайға бу җәһәттә ишләткән бесимларниң карға келидиғанлиқидин гуман қилидиғанлиқини билдүрди.

Илгири бәзи ғәрб паалийәтчилири, хитайниң иқтисади ярдими вә сиясий қоллиши судан һөкүмитиниң йүригини йоғинитип дарфур райониниң әһвалини техиму яманлаштурувәтти, дәп қарап, ғәрб әллирини дарфур мәсилисидә хитайға бирликтә бесим ишлитишкә чақирған.

Дарфурға ярдәм бериш һәрикитиниң ғоллуқ һимайичиси җорҗ клуний дүшәнбә күни токйодики зиярити җәрянида " биз хитайниң бу ишта башламчилиқ қилишини үмид қилимиз" деди вә хитайниң башқиларниң дегинигә анчә пәрва қилип кәтмәйдиғанлиқиниму қошумчә қилди.

Дарфур тоқунуши 2003- йили, дарфур районидики йәрлик милләтләрниң, әрәбләрни асас қилидиған судан һөкүмитигә қарши елип барған қозғилиңидин кийин башланған болуп, шуниңдин етибарән, хартум һөкүмитиниң қоллишиға еришкән җанҗавид қораллиқ күчлири дарфурлуқларға үзлүксиз паракәндичилик селип келиватиду.

Бирләшкән дөләтләр тәшкилатиниң санлиқ мәлуматиға қариғанда, дарфур районида, уруш, ачарчилиқ вә уруш кәлтүрүп чиқарған башқа сәвәбләр түпәйли һазирға қәдәр әң аз дегәндиму 200 миң адәм һаятидин айрилған вә нәччә милйон адәм мусапир болуп кәткән. (Җүмә)