Xitayning gu'angju shehiridiki bir sün'iy hemra téléwiziye qanili xaklandi

Namelum kishiler xitayning gu'angju sherhide hökümetke qaraydighan bir sün'iy hemra téléwiziye qanilining signalini tizginlewélip, mezkur téléwiziye qanilining signalida hökümetke qarshi programmilarni tarqatqan.

"Jenubiy astane géziti" ning xewer qilishiche, bu weqe 1 - may küni yüz bergen bolup, shu küni gu'angju sün'iy hemra kabulluq téléwiziye qanili sen'et programmisi körsitiwatqanda téléwizor signali 90 minuttek parakendichilikke uchrighan shundaqla bu jeryanda 40 sékunttek hökümetke qarshi mezmundiki körünüshler tarqitilghan.

Da'iriler téléwizorda hökümetke qarshi qandaq körünüshler tarqitilghanliqini we parakendichilik weqesining kimler teripidin élip bérilghanliqini élan qilmidi. Téléwiziye istansisidiki da'iriler bolsa bu weqege baha bérishtin özini qachurmaqta. " Jenubiy astane géziti" bu xewerni élan qilghandin kéyin bu xewer jüme küni mezkur gézitning tor bétidin éliwétildi.

Bu weqe xitayda hökümetke qaraydighan sün'iy hemra télérwiziye qanallirining tunji qétim parakendichilikke uchrash we bu téléwiziye qanallirining signalida hökümetke qarshi programmilarning tarqilish weqesi emes. Buningdin burun falun'gong teriqiti, xitayning sün'iy hemra téléwiziye signalini xaklap, kompartiyige qarshi mezmundiki programmilarni tarqatqan idi. (Erkin)