ئامېرىكا يەر شارى ئوربىتىسىدىكى بىر سۈنئىي ھەمراھىنى ئېتىپ چۈشۈردى
2008.02.21
ئامېرىكا دېڭىز ئارمىيىسى چارشەنبە كۈنى كەچتە ئامېرىكىنىڭ يەرشارى ئوربىتىسىدىكى كاردىن چىققان بىر جاسۇسلۇق سۈنئىي ھەمراھىنى باشقۇرۇلىدىغان بومبىدا مۇۋەپپەقىيەتلىك ئېتىپ چۈشۈردى. ئامېرىكا ئارمىيىسى شتاب باشلىقلار بىرلەشمىسىنىڭ مۇئاۋىن رەئىسى گېنېرال جېيمىس كارترايت پەيشەنبە كۈنى دۆلەت مۇداپىئە مىنىستىرلىقىدىكى مۇخبىرلارنى كۈتۈۋېلىش يىغىنىدا باشقۇرۇلىدىغان بومبىنىڭ دەل جايىغا تەككەنلىكىدىن "ناھايىتى خاتىرجەم" ئىكەنلىكىنى بىلدۈردى.
ئامېرىكا، ئوربىتىدىكى كاردىن چىققان مەزكۇر جاسۇسلۇق سۈنئىي ھەمراھى يەر شارىغا چۈشۈپ كەتسە، سۈنئىي ھەمراھنىڭ يېقىلغۇ ساندۇقىدىكى زەھەرلىك گازنىڭ كىشىلەرگە زىيان - زەخمەت يەتكۈزىدىغانلىقىنى كۆزدە تۇتۇپ، سۈنئىي ھەمراھ چۈشۈپ كېتىشتىن بۇرۇن ئالەم بوشلۇقىدا پاچاقلاپ تاشلىغانلىقىنى ئىلگىرى سۈرمەكتە. بەش بۇرجەكلىك بىنادىكى ئەمەلدارلار باشقۇرۇلىدىغان بومبا سۈنئىي ھەمراھنىڭ دەل يېقىلغۇ باكىنى پاچاقلاپ تاشلىغانلىقىنى ئىلگىرى سۈردى. لېكىن يەنە بەزى ئانالىزچىلار، ئامېرىكىنىڭ مەزكۇر سۈنئىي ھەمراھىنى ئېتىپ چۈشۈرۈشىدىكى يەنە بىر سەۋەب، سۈنئىي ھەمراھ يەر شارىغا چۈشۈپ كەتسە خىتاي ياكى رۇسىيىنىڭ قولىغا چۈشۈپ كېتىش خەۋپىنى كۆزدە تۇتقان، دەپ كۆرسىتىدۇ.
خىتاي بولسا ئامېرىكىنىڭ سۈنئىي ھەمراھنى ئېتىپ چۈشۈرۈش ھەرىكىتىنىڭ قاراتمىلىقىدىن گۇمانلانماقتا. چۈنكى خىتايلار 2007 - يىلى 1 - ئايدا ئالەم بوشلۇقىدىكى بىر ھاۋا رايى سۈنئىي ھەمراھىنى ئېتىپ چۈشۈرگەن ھەم شۇ قېتىمقى سىناقنى تاكى ئامېرىكا بايقىۋالغانغا قەدەر ھېچكىمگە تىنمىغان ئىدى. خىتاي تاشقى ئىشلار مىنىستىرلىقى باياناتچىسى ليۇ جيەنچاۋ پەيشەنبە كۈنى ۋەقەنى يېقىندىن كۆزىتىۋاتقانلىقىنى بىلدۈردى ھەمدە ئامېرىكىنىڭ ئالاقىدار دۆلەتلەرنى زۆرۈر ئۇچۇر ۋە مەلۇماتلار بىلەن تەمىنلىشىنى تەلەپ قىلدى. لېكىن ئامېرىكا سۈنئىي ھەمراھنىڭ ئېتىپ چۈشۈرۈلۈشىنى ھەربىي ھەرىكەت ئەمەس، دەپ ئەسكەرتمەكتە. (ئەركىن)
مۇناسىۋەتلىك ماقالىلار
- ئامېرىكا ئالەم بوشلۇقىدا كونتروللۇقنى يوقاتقان جاسۇسلۇق سۈنئىي ھەمراھىنى ئېتىپ چۈشۈرمەكچى
- ئامېرىكا دۆلەت ھەربىي مەخپىيەتلىكىنى خىتايغا ساتقان 4 كىشى قولغا ئېلىندى
- ئاقسۇ ئاسمىنىدا كۆرۈلگەن سىرلىق ئوت پارچىسى
- ئامېرىكا دېڭىز ئارمىيىسى قوماندانى خىتاينى زىيارەت قىلماقچى
- ياپونىيە يېقىندا ھىندونېزىيىگە ئۈچ دانە ئىلغار چارلىغۇچى پاراخوت ياردەم قىلدى
- ئامېرىكا خىتايغا تېخنىكا ئېكىسپورت قىلىش جەھەتتىكى بەلگىلىمىلەرنى چىڭىتماقتا
- ھەربىي مۇتەخەسسىسلەرنىڭ 'ئايپەرى بىر' بەلگىلىك سۇنئىي ھەمراھ ھەققىدىكى باھالىرى
- خىتاينىڭ ئايپەرى 1- نومۇرلۇق سۈنئىي ھەمراھى پەلەكتە 12 مۇقامنى ياڭراتماقچى
- خىتاي ئامېرىكا بەش بۇرجەكلىك بىناسىنىڭ كومپيۇتور سىستېمىسىغا ھۇجۇم قىلغانلىقىنى ئىنكار قىلدى
- بەش دۆلەت يېقىندا ئۆتكۈزۈلىدىغان ھەربىي مانېۋىرنىڭ خىتايغا قارىتىلغانلىقىنى ئىنكار قىلدى