Amérika yer shari orbitisidiki bir sün'iy hemrahini étip chüshürdi

Amérika déngiz armiyisi charshenbe küni kechte amérikining yershari orbitisidiki kardin chiqqan bir jasusluq sün'iy hemrahini bashqurulidighan bombida muweppeqiyetlik étip chüshürdi. Amérika armiyisi shtab bashliqlar birleshmisining mu'awin re'isi général jéymis kartrayt peyshenbe küni dölet mudapi'e ministirliqidiki muxbirlarni kütüwélish yighinida bashqurulidighan bombining del jayigha tekkenlikidin "nahayiti xatirjem" ikenlikini bildürdi.

Amérika, orbitidiki kardin chiqqan mezkur jasusluq sün'iy hemrahi yer sharigha chüshüp ketse, sün'iy hemrahning yéqilghu sanduqidiki zeherlik gazning kishilerge ziyan ‏- zexmet yetküzidighanliqini közde tutup, sün'iy hemrah chüshüp kétishtin burun alem boshluqida pachaqlap tashlighanliqini ilgiri sürmekte. Besh burjeklik binadiki emeldarlar bashqurulidighan bomba sün'iy hemrahning del yéqilghu bakini pachaqlap tashlighanliqini ilgiri sürdi. Lékin yene bezi analizchilar, amérikining mezkur sün'iy hemrahini étip chüshürüshidiki yene bir seweb, sün'iy hemrah yer sharigha chüshüp ketse xitay yaki rusiyining qoligha chüshüp kétish xewpini közde tutqan, dep körsitidu.

Xitay bolsa amérikining sün'iy hemrahni étip chüshürüsh herikitining qaratmiliqidin gumanlanmaqta. Chünki xitaylar 2007 ‏- yili 1 ‏- ayda alem boshluqidiki bir hawa rayi sün'iy hemrahini étip chüshürgen hem shu qétimqi sinaqni taki amérika bayqiwalghan'gha qeder héchkimge tinmighan idi. Xitay tashqi ishlar ministirliqi bayanatchisi lyu jyenchaw peyshenbe küni weqeni yéqindin közitiwatqanliqini bildürdi hemde amérikining alaqidar döletlerni zörür uchur we melumatlar bilen teminlishini telep qildi. Lékin amérika sün'iy hemrahning étip chüshürülüshini herbiy heriket emes, dep eskertmekte. (Erkin)