Хитай һөкүмитиниң аләм бошлуқида елип барған башқурулидиған бомба синиқи һиндистанниңму тәнқидигә учриди
2007.02.05
Хитай һөкүмитиниң 11- январ күни аләм бошлуқида елип барған башқурулидиған бомба синиқи америка, явропа иттипақи һәмдә японийиниң қаттиқ тәнқидигә учриған. Хитай һөкүмитиниң башқурулидиған бомба синиқи һәтта америка вә явропа иттипақидики хитайниң тәрәққияти ғәрб үчүн тәһдит әмәс дегән көз қарашни тәкитләп келиватқан сиясәтчиләр вә мулаһизичиләрниму ойға селип қойған иди. Улар, хитайниң бу һәрикити аләм бошлуқида бир һәрбий риқабәтниң башлинишиға сәвәб болуши мумкин дәп билдүргән.
Дүшәнбә күни һиндистан һөкүмитиму хитайниң бу һәрикитини тәнқид қилған һөкүмәтләр сипигә қошулди. Ройтрис агентлиқиниң хәвәр қилишичә, һиндистанниң аләм бошлуқи тәтқиқат идарисиниң рәиси мадһаван найәр дүшәнбә күни бәргән баянатида, хитай һөкүмитиниң аләм бошлуқида елип барған башқурулидиған бомба синиқини қаттиқ тәнқид қилип, бейҗиң һөкүмитиниң бу һәрикити хәлқара қаидә-қанунларға хилап, биз аләм бошлуқини қоралландурмаслиқимиз керәк, дәп көрсәткән. Униң ейтишичә, бундақ синақ арқилиқ бир суний һәмраһни йоқитиш, аләм бошлуқидики әхләт миқдарини көпәйтивитидикән.
Мадһавандин бурун һиндистан ташқи ишлар министири мукәрҗи аләм бошлуқини қоралландурушни тохтитиш керәкликини тәкитләп, бундақ бир һәрикәт пүтүн дөләтләрниң тәрәққиятиға сәлбий тәсир йәткүзиду, дәп көрсәткән иди.
Нурғунлиған сиясий мулаһизичиләр, хитай һөкүмити аләм бошлуқида башқурулудиған бомба синиқи елип барғандин кейин, хитайниң иқтисади күчини һәрбий күчкә айландуруш нийити йоқ, шуниң үчүн хитайни бир тәһдит дәп қаримаслиқ керәк, дегән көз қарашни бикар қилғанлиқини билдүрмәктә. (Қанат)
Мунасивәтлик мақалилар
- Америка авам палата әзалири америкиниң хитайға қарши аләм бошлуқи риқабәт күчини күчәйтишкә чақирди
- Аләм бошлуқидиму хитайниң әхләтлири ләйләйду
- Хитай америкиниң сүний һәмраһға қарши башқурулидиған синиқи тоғрисида сөзлишиш тәклипигә җавап бәрмигән
- Хәлқара җәмийәт хитайниң сүний һәмраһға қарши лазир нурлуқ қорал синақ қилғанлиқини әйиблиди
- Хуҗинтавниң һиндистан зияритиниң үчинчи күнидә