Иран, сүрийә билән бир сәптә туруп тәһдиткә ортақ тақабил туридиғанлиқини җакарлиди


2005.02.16

Иранниң муавин президенти муһәммәд реза ареф чаршәнбә күни сүрийә баш министири муһәммәд наҗи отари билән көрүшкәндә, иранниң сүрийә билән бир сәптә туруп "тәһдит" кә ортақ тақабил туридиғанлиқини билдүрди.

Америка бирләшмә агентлиқиниң хәвиригә қариғанда, муһәммәд реза ареф сөзидә, "биз һәр қачан сүрийиниң тәһдиткә тақабил туришиға ярдәмдә болимиз" деди. Сүрийә баш министири отариму охшаш қарашта болуп, " бундақ сәзгүр бир пәйттә, нурғун риқабәтләргә икки дөләт ортақ һәмкарлишип тақабил туруши зөрүр" дәп билдүрди.

Гәрчә хәвәрдә улар тилға елип өткән "тәһдит" вә "риқабәт" ләрниң немини көрситидиғанлиқини чүшәндүрүлмисиму, әмма бу иккила дөләт, нөвәттә америка иқтисадий вә дипломатик җаза беришни ойлишиватқан дөләтләрдур.

Америка изчил түрдә иранни ядро қоралларни тәрәққий қилдуриватиду дәп әйибләп кәлди. Буниңдин сирт йәнә, америкиниң сүрийә билән болған мунасивитиму ливанниң сабиқ баш миниситири рәфиқ харириниң қәстләп өлтүрилиши билән йирикләшти. Шундақла америка бу сәвәптин һәр иккила дөләттики баш әлчисини қайтуруп әкәлди.

Иран билән сүрийә узундин бери истратегийилик иттипақдаш дөләтләр болуп, һәтта сүрийә 1980 - йилидин 1988 -йилиғичә созулған иран-ирақ уруши мәзгилидиму, иран билән достанә мунасивәт бағлиған бирдин-бир әрәб дөлити болуп һесаблиниду. (Пәридә)

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.