Iran, süriye bilen bir septe turup tehditke ortaq taqabil turidighanliqini jakarlidi

Iranning mu'awin prézidénti muhemmed réza aréf charshenbe küni süriye bash ministiri muhemmed naji otari bilen körüshkende, iranning süriye bilen bir septe turup "tehdit" ke ortaq taqabil turidighanliqini bildürdi.

Amérika birleshme agéntliqining xewirige qarighanda, muhemmed réza aréf sözide, "biz her qachan süriyining tehditke taqabil turishigha yardemde bolimiz" dédi. Süriye bash ministiri otarimu oxshash qarashta bolup, " bundaq sezgür bir peytte, nurghun riqabetlerge ikki dölet ortaq hemkarliship taqabil turushi zörür" dep bildürdi.

Gerche xewerde ular tilgha élip ötken "tehdit" we "riqabet" lerning némini körsitidighanliqini chüshendürülmisimu, emma bu ikkila dölet, nöwette amérika iqtisadiy we diplomatik jaza bérishni oylishiwatqan döletlerdur.

Amérika izchil türde iranni yadro qorallarni tereqqiy qilduriwatidu dep eyiblep keldi. Buningdin sirt yene, amérikining süriye bilen bolghan munasiwitimu liwanning sabiq bash minisitiri refiq xaririning qestlep öltürilishi bilen yirikleshti. Shundaqla amérika bu seweptin her ikkila dölettiki bash elchisini qayturup ekeldi.

Iran bilen süriye uzundin béri istratégiyilik ittipaqdash döletler bolup, hetta süriye 1980 - yilidin 1988 -yilighiche sozulghan iran-iraq urushi mezgilidimu, iran bilen dostane munasiwet baghlighan birdin-bir ereb döliti bolup hésablinidu. (Peride)