Тәйвән президенти рим папасиниң дәпнә мурасимиға қатнашмақчи

Тәйвән даирилириниң билдүрүшичә, тәйвән президенти чен шүйбйәнниң, рим папаси җон паул 2 ниң дәпнә мурасимиға қатнишиш илтимаси қобул қилинип, униңға италийигә кириш визиси берилгән. Бу, анализчилар тәрипидин тәйвән депломатийисидики бир бөсүш дәп қаралмақта.

Тәйвән ташқи ишлар министирлиқиниң билдүрүшичә, чен шүйбйән пәйшәнбә күни италийә пайтәхти римға қарап йолға чиқип, андин рим арқилиқ ватиканға келип дәпнә мурасимиға қатнишидикән.

Ватикан, явропадики тәйвән билән рәсмий дипломатик мунасивәт орнатқан бирдин бир җай болуп, чен шүйбйәнму ватиканни зиярәт қилған тунҗи тәйвән президенти һесаблинидикән.

Тәйвән ташқи ишлар министирлиқиниң баянатчиси лү чиңлоң бу мунасивәт билән, гәрчә хитай һөкүмитиниң күчлүк бесими болсиму, италийиниң йәнила чен шүйбйәнгә виза беришни қарар қилғанлиқини билдүрди. У йәнә, ватикан билән тәйвән оттурисидики мунасивәтниң изчил яхши икәнликини, шундақла әгәр хитай дөлитидики диний әркинлик мәсилисини һәл қилмиса, униң ватикан билән яхши мунасивәт орнутушиниң тәскә тохтайдиғанлиқини әскәртти.

Хитай һөкүмити 50 - йиллири хитайдики чәтәллик дин тарқатқучиларни қоғлап чиқарғандин буян, ватикан хитай билән болған дипломатик мунасивитини үзгән иди.

Хоңкоңдики католик дини епсикопи чен риҗүн, рим папасиниң һаят чеғида хитай билән болған мунасивәтни әслигә кәлтүрүшни изчил халап кәлгәнликини, әмма хитай болса ватиканға, тәйвән билән болған дипломатик мунасивәтни үзүш һәмдә хитайниң ички ишиға арилашмаслиқтәк икки шәртни қоюп туривалғанлиқи сәвәбидин, икки тәрәп мунасивитиниң техичә әслигә кәлмигәнликини билдүрди. (Пәридә)