Пакистанда қолға чүшкән талибанлар қомандани сорақ қилинмақта

2007-03-03
Елхәт
Пикир
Share
Принт

Хәвәрләргә қариғанда, америка вә пакистан разветка хадимлири, чаршәнбә күни пакистанниң койтә шәһиридә қолға чүшкән, талибанларниң сабиқ мудапиә министири молла өбәйдулла ахондни сорақ қилмақта. Америка вә пакистан бихәтәрлик хадимлири, молла өбәйдулладин талибанларниң башқа рәһбәрлириниң қайси йәрдә икәнлики һәққидә муһим ахбарат қолға кәлтүрүшни үмид қилидиғанлиқини билдрүмәктә.

Пакистан һөкүмәтниң исмини ашкарилашни халимиған бир хадиминиң франсийә агентлиқиға билдүрүшичә, койтә шәһиридә пакистан бихәтәрлик хадимлири тәрипидин тутулған, талибанларниң рәһбири молла өмәрниң йеқин ярдәмчилиридин бири һесабланған молла өбәйдулла, һәрбий тик учар билән пакистанниң пайтәхти ислам абадға елип келингән болуп, нөвәттә пакистан вә америка разветка хадимлири уни сорақ қилмақта.

Лекин җүмә күни талибанларниң бир баянатчиси, молла өбәйдулла ахундниң пакистан бихәтәрлик органлири тәрипидин тутулғанлиқини рәт қилип, униң һелиму афғанистанда икәнликини билдүрди.

Сиясий мулаһизичиләр, талибанларниң муһим рәһбәрлиридин бири болған молла өбәйдулланиң америка муавин президенти дек чейниниң пакистанни туюқсиз зиярәт қилишидин икки күн кейин тутулғанлиқиға диққәт қартмақта. Бу зиярәт җәрянида америка муавин президенти дек чейни пакистан президенти пәрвез мушәррәптин талибанлар вә әлқаидә қалдуқлириниң паалийәтлирини тохтитиш үчүн техиму җиддий тәдбирләр елишини тәләп қилған иди.

Афғанистан һөкүмити вә ғәрб дөләтлириниң хадимлири узундин бери, талибан рәһбәрлириниң пакистанниң койтә шәһирини мәркәз қилған һалда паалийәт елип бириватқанлиқини тәкитләп кәлмәктә. Гәрчә 2005‏- йили талибанларниң баянатчиси койтә шәһиридә қолға чүшкән болисму, әмма пакистан талибанларниң рәһбәрлириниң афғанистан ичидә икәнликини вә уларни тутуш вәзиписиниң афғанистан һөкүмитиниң мәсулийити икәнликини тәкитләп кәлгән. (Қанат)

Пикирләр (0)
Share
Толуқ бәт