Пакистан һөкүмити қәбилиләр билән келишим имзалиди


2007.03.17

Пакистан һөкүмити шәнбә күни, пакистан афғанистан чегра районидики қәбилә башлиқлири билән, чәтәллик милтантларни райондин тазилаш вә райондин афғанистанда паалийәт елип бериватқан талибанларға ярдәм әвәтилишини тохтитиш үчүн бир келишим имзалиди.

Баҗавәр райондики бир қәбилә билән имзланған бу келишим, пакистан һөкүмитиниң пакистан- афғанистан чегра райондики қбилиләр билән имзалиған үчүнҗи келишими болуп һесаблиниду.

Ғәрб дөләтлиридики нурғүн мулаһизичиләр пакистан һөкүмитиниң бундин бурун вәзиристандики қәбилиләр билән имзалиған келишимини талибан вә әлқаидә қалдуқлириниң районда әркин паалийәт елип бериши үчүн пурсәт яритип бериду дәп, қаттиқ тәнқид қилған вә америка һөкүмәт хадимлири, имзланған келишимләрниң афғанистандики чәтәл һәрбий күчлири вә афған армийисигә қарита елип бериливатқан һуҗумларни азайтмиғанлиқини тәкитлигән.

Афғанситандики талибанлар һакимийити 2001‏- йили америкниң һәрбий һәрикити билән гумран болғандин кейин, нурғунлиған әлқаидә вә талибан милитантлири пакистанға қечип, пакистан афғанистан чегра районида панаһланған һәмдә райондики пәштун қәбилилири уларға панаһлиқ берип, қоғдиған.

Пакистан һөкүмити районда панаһланған чәтәл милитантлирини тазилаш вә уларниң пакистанлиқ иттипақдашлирини бойсундуруш үчүн районда кәң көләмлик һәрбий һәрикәтләр елип барған булуп, бу һәрикәтләр җәрянида йүзлигән киши өлгән.

Пакистан һөкүмити 2005‏- йили райондики тоқунушларни тохтитиш үчүн җәнубий вәзиристандики қәбилиләр билән бир келишим имзалиған вә өткән йили синтәбир ийида шмалий вәзириистандики қәбилиләр биләнму охшаш бир келишим имзалиған иди. Бу келишимгә асасән пакистанк мәзкур районларда һәрбий һәрикәт елип беришини тохтатқан вә райондики қәбилиләр чәтәллик милитантларниң мәзкур районларда паалийәт елип беришиға рухсәт бәрмәйдиғанлиқини вәдә қилған.

Әмма, ғәрб дөләт хадимлири һәмдә афғанистан һөкүмити келишимни қаттиқ тәнқид қилип, бу келишимниң талибанларниң афғанистандики һуҗумлирини кеңәйтишигә йол ачқанлиқини билдүрмәктә. (Қанат)

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.