Гөрөгә елинған җәнубий корийиликләрни қутқузуш мәсилсидә илгириләш болмиди


2007.08.05

Талибанлар тәрипидин гөрөгә елинған 21 җәнубий корийә пуқрасини қутқузуш мәсилсидә һечқандақ илгириләш болмиди.

Йәкшәнбә күни америка президенти җурҗ буш билән афғанистан президенти һамид кәрзәйниң учришиши һарписида, талибанларниң баянатчиси юсуф әхмәди, гөрөгә елинған җәнубий корийиликләр өлтүрүлүши мумкин дәп, тәһдит қилди. Җәнубий корийә һөкүмити президент буш вә президент кәрзәйниң учришишниң талибанлар тәрипидин гөрөгә елинған җәнубий корийә пуқралириниң қоюп берилишигә ярдәм беридиғанлиқини үмид қилмақта.

Лекин талибанларниң баянатчиси, икки күндин бери җәнубий корийә вә афған һөкүмитиниң гөрөгә елинғанларни қутқузуш мәсилсидә талибанлар билән һечқандақ алақә қурмиғанлиқини тәкитләп, "әгәр улар гөрүгә елинғанларниң саламәт турушини халисиа, җиддий һәрикәт қилиши керәк, әгәр бу иш җиддий қаралмиса, гөрөгә елинғанлар һәрқандақ чағда өлтүрүлүши мумкин" дегән. У, шундақла, талибанларниң җәнубий корийә һөкүмәт вәкиллири билән талибанларниң контроллиқидики бир районда яки башқа бир дөләттә, сөһбәт елип беришқа тәйяр икәнликини билдүрди.

Хәвәрләргә қариғанда, америка президенти җурҗ буш билән афғанистан президенти һамид кәрзәйниң учришиши, гөрөгә елинғанларни қутқузуш үчүн елип бериливатқан сөһбәтләрниң қандақ нәтиҗә беридиғанлиқи мәсилсидә муһим рол ойнайдикән.

Афғанистан һөкүмити, талибанларниң, түрмидики талибан мәһбуслириниң қоюп берилиши тоғрисидики тәләплирини рәт қилмақта. Хәвәрләргә қариғанда, америка һөкүмити афған һөкүмитиниң бу мәйданини қоллайдикән. Афғанистан һөкүмити, талибанларниң тәлибини қобул қилиш, гөрүгә елиш вәқәлирини техиму көпәйтивитиши мумкин дәп, әндишә қилмақта.

Март ейида афған һөкүмитиниң талибанлар тәрипидин гөрөгә елинған бир италийә пуқраисини қутқузуш үчүн талибанларниң түрмидики бир талибан қоманданини қоюп бериш тәлибини қобул қилғанлиқи, америка һөкүмитиниң қаттиқ тәнқидигә учриған иди. (Өмәр қанат)

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.