Afghanistanda 20 taliban militanti öltürüldi

Jüme küni, afghanistandiki ittipaqdash armiye qisimliri we afghan milliy armiyisi teripidin, afghanistanning sherqiy rayonigha jaylashqan, kunar ölkiside élip bérilghan keng kölemlik bir herbiy herikette, 20 din artuq taliban militanti ölgen.

Kunar ölkisining bashliqi fezlulla wahidining fransiye agéntliqigha bildürüshiche, herbiy heriket jeryanida 10 din artuq taliban militanti yarilan'ghan bolup, ular yéqinda afghanistanda hujumlar élip bérish üchün, pakistan chégrisidin kunar ölkisige kirgen iken.

Kunarde, taliban qalduqlirigha qarshi élip bérilghan heriketke qatnashqan, afghan milliy armiye xadimlirining bildürüshiche, ölgen we yarilan'ghan taliban militantlirining arisida nurghunlighan chet'ellikler bar iken.

2001‏- Yili amérikining herbiy herikiti netijiside, afghanistandiki hakimiyiti gumran bolghan talibanlar, qaytidin teshkillinip, afghanistandiki ittipaqdash armiye qisimliri we afghan milliy armiyisige qarshi hujumlar élip barmaqta.

Xewerlerge qarighanda, yéqindin béri, afghanistandiki taliban qalduqliri pa'aliyetlirini téximu kücheytken bolup, amérika ötken seyshenbe küni, talibanlarning herikitige qarshi turush üchün, afghanistan'gha yene 3200 neper amérika déngiz armiyisining quruqluqta jeng qilghuchi qisimlirini ewetidighanliqini, jakarlidi.