Талибанлар гөрүгә еливалған җәнубий корийиликтин йәнә сәккизини қоюп бәрди

Қораллиқ талибанлар җәнубий корийә билән алтә һәптә давамлашқан сөзлишиш арқилиқ, 8 ‏- айниң 29 ‏- күни (чаршәнбә күни) гөрүгә еливалған 19 җәнубий корийиликниң 8 ини қоюп бәргән.

'Бирләшмә агентлиқи'ниң афғанистанниң қәләйғази шәһиридин хәвәр қилишичә, қизил киреист шаһитлири талибанлар биринчи түркүмдә 3 нәпәр җәнубий корийилик аялни қәләйғазида қоюп бәргәнликини, йәнә бир нәччә саәт өткәндин кейин, җәнубий корийилик төт аял вә бир әрни шаһбазға йеқин бир чөлдә қоюп бәргәнликини испатлиған.

Хәвәрдә баян қилинишичә, җәнубий корийә ташқи ишлар министирлигиниң баянатчиси чохийоңниң сиол шәһиридә баян қилишичә, талибанларниң гөрүгә еливалған җәнубий корийиликләрни бу қетим қоюп бериши‏-‏- җәнубий корийә даирилири афғанистанға әвәткән әскирини йил ахиридин бурун қайтуруп келишкә вәдә бәргәндин кейин йүз бәргән.

Хәвәр архиплириға қариғанда, талибанлар 7 ‏- айниң 19 ‏- күни, кабулдин қәндихарға аптобус билән саяһәткә маңған кишиләрдин 23 нәпәр җәнубий корийиликни қәндихарда гөрүгә еливалғандин кейин, икки әрни етип ташлап, икки аялнила қоюп бәргән иди. (Вәли)