Хитай талаш - тартиштики шәрқий деңиз раюниға һәрбий парахутлирини әвәтти


2005-09-29
Share

Хитай вә японийә, талаш тартиштики шәрқий деңиз мәсилиси һәққидә сөһбәт өткүзүшниң һарписида, хитай һөкүмити шәрқий деңизға һәрбий парахотлирини әвәткәнликини етирап қилди.

Ройтирс агентлиқиниң хәвиригә қариғанда, японийә вә хитай әмәлдарлири, 30 - сентәбир күни токйода, талаш - тартиштики шәрқий деңиз районлиридики нефит вә тәбиий газ мәсилилири бойичә сөһбәт елип бармақчи иди. Әмма буниң һарписида, хәлқара мәтбуатлар бирдәк хитай һәрбий даирилириниң шәрқий деңизда бир запас уруш парахот әтрити қурғанлиқиға диққәт қилған.

Хитай ташқи ишлар министирлиқиниң баянатчиси чин гаң пәйшәнбә күни буни етирап қилди. У "бундақ бир запас уруш парахот әтрити қуруш, деңиз армийимизниң тинч мәзгилләрдә җиддий әһвалларға тақабил туруш, җиддий адәм йөткәш , деңиздики тосқунлуқларни тездин йоқитиш қатарлиқ җәһәтләрдики иқтидарини өстүрүшни мәқсәт қилиду" дәп көрсәтти.

Әмма чин гаң бу әтрәтниң көлими вә чарлаш даириси һәққидә мәлумат беришни рәт қилди. Шуңа бу әтрәтниң японийигә тақабил турушни мәқсәт қилған - қилмиғанлиқини һөкүм қилиш интайин тәс.

Буниң алдида, японийә хитайниң байлиққа мол шәрқий деңиз районида тәбиий газ қезишқа башлиғанлиқини билдүрүп, буниңға қаттиқ нарази болған. Чүнки японийә, хитайниң бу райондики қезиш паалийәтлириниң, японийә тәвәликидики деңиз астидики тәбиий газ вә нефитләрни сүмүрүп кетидиғанлиқидин әндишә қилмақта. Бу сәвәбтин, икки дөләт мунасивити техиму йирикләшмәктә.

Хитай вә японийиниң тәбиий байлиққа мол шәрқий деңизда зимин даваси бар болуп, икки тәрәп бир- бириниң бу райондики нефит вә тәбиий газ қедириш пиланиға қарши. (Арзу)

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт