Xitay talash - tartishtiki sherqiy déngiz rayunigha herbiy paraxutlirini ewetti

Xitay we yaponiye, talash tartishtiki sherqiy déngiz mesilisi heqqide söhbet ötküzüshning harpisida, xitay hökümiti sherqiy déngizgha herbiy paraxotlirini ewetkenlikini étirap qildi.

Roytirs agéntliqining xewirige qarighanda, yaponiye we xitay emeldarliri, 30 - séntebir küni tokyoda, talash - tartishtiki sherqiy déngiz rayonliridiki néfit we tebi'iy gaz mesililiri boyiche söhbet élip barmaqchi idi. Emma buning harpisida, xelq'ara metbu'atlar birdek xitay herbiy da'irilirining sherqiy déngizda bir zapas urush paraxot etriti qurghanliqigha diqqet qilghan.

Xitay tashqi ishlar ministirliqining bayanatchisi chin gang peyshenbe küni buni étirap qildi. U "bundaq bir zapas urush paraxot etriti qurush, déngiz armiyimizning tinch mezgillerde jiddiy ehwallargha taqabil turush, jiddiy adem yötkesh , déngizdiki tosqunluqlarni tézdin yoqitish qatarliq jehetlerdiki iqtidarini östürüshni meqset qilidu" dep körsetti.

Emma chin gang bu etretning kölimi we charlash da'irisi heqqide melumat bérishni ret qildi. Shunga bu etretning yaponiyige taqabil turushni meqset qilghan - qilmighanliqini höküm qilish intayin tes.

Buning aldida, yaponiye xitayning bayliqqa mol sherqiy déngiz rayonida tebi'iy gaz qézishqa bashlighanliqini bildürüp, buninggha qattiq narazi bolghan. Chünki yaponiye, xitayning bu rayondiki qézish pa'aliyetlirining, yaponiye tewelikidiki déngiz astidiki tebi'iy gaz we néfitlerni sümürüp kétidighanliqidin endishe qilmaqta. Bu sewebtin, ikki dölet munasiwiti téximu yirikleshmekte.

Xitay we yaponiyining tebi'iy bayliqqa mol sherqiy déngizda zimin dawasi bar bolup, ikki terep bir- birining bu rayondiki néfit we tebi'iy gaz qédirish pilanigha qarshi. (Arzu)

Buni bésish arqiliq, pikringizni yézing

• Print
• Hembehr
• Ewetish

Barliq pikir - bayanlarni körüsh.

• Bügünki anglitish
• Ilgiriki anglitishlar