Xitay soda-sana'et wekiller ömiki tashkentte pa'aliyet qildi

Xitay maliye ministirining özbékistan ziyariti ramkisi astida xitay tijaret wekiller ömiki 6-iyuldin 9-iyulghiche özbékistanning tashkent qatarliq sheherliride ziyarette bolghan.

Perghane agéntliqining özbékistan soda ishliri idarisining uchuridin neqil keltürüshiche, xitay wekiller ömikining ziyaritining tüp meqsiti xitayning chong shirketlirining özbékistandiki toqumchiliq , yéza igilik , yipekchilik sana'et üsküniliri yasash, tenheriketchilerning bash kiyimliri tikish , qurulush we yaghachchiliq sana'iti qatarliq her sahe bilen shughullinidighan shirket-karxanilar bilen hemkarliq ornitishtin ibarettur. 9-Iyul küni ikki dölet soda-sana'etchiliri hem shirketlirining rehberliri arisida besleshtürüp sétish pa'aliyiti uyushturulidiken.

Nöwette, xitayning ottura asiya döletliri bilen élip bériwatqan sodisining omumiy qimmiti yette milyard amérika dolliri etrapida bolup, bularning ichide peqet qazaqistan bilen bolghan soda qimmitila 6 milyard dollargha yetken. Uningdin kéyin tajikistan, özbékistan, qirghizistanlar turghan bolup, uchurlardin qarighanda xitay bilen özbékistan arisida 530 kilométrliq tebi'iy gaz turubisi yatquzup, özbékistan tebi'iy gazlirini xitaygha sétish heqqide kélishim hasil qilin'ghan.

Egerde énérgiye sahesidiki bu soda emelge ashsa, kelgüside özbékistan xitayning ottura asiyadiki yene bir chong soda shériki bolup qélishi mumkin iken.

Özbékistan hökümiti 2005-yili, enjan weqesidin kéyin amérika bilen bolghan munasiwetni soghuqlashturup, xitay we rusiye bilen bolghan siyasiy hem iqtisadiy hemkarliqlarni ashurghan shuningdek tashkent rehberliri rusiye we xitay mebleghlirini özbékistan'gha élip kirishke tirishmaqta. (Ümidwar)