Qirim tatarliri saqchilar bilen toqunushti

Ukra'iniye kontrol astigha éliwalghan qirim arilidiki qirim tatarliri özlirining yer zéminlirini telep qilish heriketlirini dawamlashturmaqta. Shenbe küni qirimdiki sudaq sheherlik hökümetning aldida 50 nechche neper qirim tatarlirining wekilliri yighilip, özlirige tewe dep qaralghan yerlerni qayturup bérishni telep qilip, sheher bashliqini özliri bilen körüshüshke chaqirghan bolsimu, lékin netije chiqmighan, meydan'gha qoralliq saqchilar kélip ularni tarqitiwetmekchi bolghanda toqunush kélip chiqqan.

Rusiyining "newsru" uchur torining xewer qilishiche, toqunushqa töt adem qolgha élin'ghandin kéyin weqe téximu kéngeygen. Tatarlar sheherning asasliq kochilirini qamal qilip, yollarni tosuwetken. Ukra'iniye ichki ishlar ministirliqining mu'awini neq meydan'gha yétip kelgen bolup, toqunushta umu zerbe yigen. Weqeni bésiqturush üchün ukra'iniye ichki ishlar ministirliqi 150 neper qoralliq saqchi we 50 nechche neper alahide xizmet jengchisini ewetken.

Bu mushu bir hepte ichide üchinchi qétim yüz bergen toqunush weqesi bolup, düshenbe küni tatarlar yalta shehiridin simférépol shehirige baridighan yollarni tosuwalghan, qirim tatarliri bilen ruslar we ukra'inlar arisida dwamliq toqunushlar kélip chiqqan.

Qirim tatarlirining yer zémin telep qilishi we yerlerni özlikidin igilishige seweb bolghan weqe 1944-yili ularning stalin teripidin ottura asiyagha heydiwétlishi bolup, eyni waqitta stalin qirim aptonom jumhuriyitini bikar qilip, barliq tatarlarni xa'in dep öz yurtliridin heydiwetken, qirim tatarlirining yerliri, öylirini ruslar, ukra'inlar igiligen. Stalin ölgendin kéyin qirim tatarliri öylirige qaytqan bolsimu, lékin ular héch némige érishelmigen hemde kemsitilishke uchrighan.

Sowét ittipaqi yimirilgendin kéyin qirim mesilisi ukra'iniyige qalghan. Qirim tatarliri öz hoquqliri we bashqilar igiliwalghan yer-zéminlarni qayturuwélish üchün jiddiy pa'aliyetlerni élip barmaqta. Bir qisim tatar hökümet yerlirini qayturup bermigende , öz ixtiyari bilen yerlerni igiliwélish charisi qollan'ghan. (Ümidwar)