Amérika doklatida, xitayning amérikigha qaratqan jasusluq heriketlirining tehditini mölcherlidi


2005.05.16

Amérika dölet mudapi'e ministirliqi yéqinda doklat chiqirip, pütün dunyadiki jasusluq heriketlerning amérikigha élip kélidighan tehditini mölcherlidi. Doklatta xitayning ötkenki yigirme yil ichidiki axbarat toplash iqtidarining zor derijide éship, amérika we rusiyidinla kéyin turidighanliqi körsitilgen.

" Jasusluq tehdit qollanmisi" namliq mezkur doklatta éytilishiche, xitay axbarat toplash jehette etrapidiki hindistan, yaponiye, rusiye, jenubiy koriye qatarliq döletlerni nuqtiliq nishan qilghan hemde amérikining sherqiy jenubiy asiyadiki herbiy bazisidin chiqqan signallargha alahide qiziqqan.

Doklatta bildürülüshiche, xitay gerche amérikidin éléktronluq axbaratlarni toplash qabiliyitini dawamliq kücheytiwatqan bolsimu, biraq yéqin kelgüside, xitay asasliqi yenila xelq ichidiki tetqiqat organliri we dölet mejlisining ashkarilan'ghan höjjetliridin amérikining axbaratlirini toplaydiken.

Doklatta yene tekitlinishiche, xitayning amérikida yette diplomatiye orgini, 2700 din artuq soda orgini bar bolup, buningdin sirt, amérika uniwérsitétlirida oquwatqan we mektep püttürgen 100 mingdek oqughuchisi bar iken. Bularning hemmisi xitayning axbarat toplash xizmitige asanliq tughduridiken. Xitay hökümiti yene yéqinqi yillardin buyan, amérika puqraliqigha ötken xitaylarni axbarat toplash ishlirigha salmaqta iken.

Emma doklatta körsitilishiche, xitayning axbarat toplash usuli asasliqi intayin köp ademni ishqa sélish arqiliq yighqan cheklik uchurlarni toplash bolup, bu xil usulning emeliyette ünümi töwen iken. (Arzu)

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.