Yaponiye tashqiy ishlar ministiri: junggo yaponiyige herbiy tehdit

Yaponiye tashqiy ishlar ministiri taro asuning tekitlishiche, junggo yaponiyige herbiy tehdit shekillendürmekte. Yaponiye metbu'atlirining xewer qilishiche, taro asu yekshenbe küni xitay - yaponiye munasiwiti we yaponiye bash ministiri koyzumining yasukoni buzrukgahini ziyaret qilish herikiti qatarliq bir qatar mesililer üstide toxtalghan.

Taro asu yaponiye fushi téléwiziye istansisining ziyaritini qobul qilghanda, "junggoning herbiy xam choti shiddet bilen köpeymekte, deydu. Uning tekitlishiche, xitay herbiy xam chotining éniqliq derijisi roshen emes. Tashqiy dunya xitay herbiy xam chotining qeyerlerge xejliniwatqanliqi bilmeydu. Etraptiki döletler buningdin tehdit hés qilmaqta.

1990 - Yillardin béri ,xitayning dölet mudapi'e herbiy xam choti yiligha 2 reqemlik san boyiche köpiyip mangdi. Bu yil 3 - ayda xitay hökümiti bu yilqi dölet mudapi'e xam chotini 35 milyard dollargha östürüp, 14 % ashurghanliqini jakarlighan. Lékin amérika da'irilirining perez qilishiche, xitayning yilliq herbiy xam choti ular élan qilghan sandin köp yuqiri bolushi mümkin.

Bezi köxetküchiler, xitay herbiy xam chotining emeliyettiki sani 105 milyard dollar etrapida bolushi mumkin, dep qarimaqta. Lékin xitay hökümiti herbiy xam chotni ashurushtiki meqsidi herbiylerning turmushini yaxshilash, telim - terbiyige sélinidighan mebleghni köpeytish we herbiy eslihelerni yéngishlash üchün, dep körsetmekte. (Erkin)