Gérmaniye xitayning shu dölettiki Uyghurlar heqqidiki erzini tekshürmekchi

Gérmaniye tekshürgüchi xadimliri, xitay hökümitining " bir qisim Uyghurlar gérmaniyide turup, xitaygha qaritilghan térrorluq heriketlerni pilanlimaqta" digen erzini tekshürüsh üchün, pat arida xitayni ziyaret qilmaqchi.

Fransiye axbarat agéntliqining xewirige qarighanda, ikki neper gérmaniye tekshürgüchi xadimi pat arida béyjinggha bérip, xitay hökümiti toplighan atalmish " pakitlar" üstidin tekshürüsh élip baridiken.

Xitay hökümiti ilgiri , gérmaniyidiki Uyghurlar kishilik heq - hoqoqlirini ilgiri sürüsh üchün qurghan "dunya Uyghur yashlar qurultiyi" we "sherqiy türkistan uchur merkizi" ni térrorchi teshkilat dep élan qilip, gérmaniye hökümitidin mezkur teshkilatlarni chekleshni telep qilghan idi. Biraq, gérmaniye hökümiti xitayning bu telipini ret qilghan.

Xitay hökümiti yene bir nechche ay burun, hindistan hökümitige pakistandiki bir qisim Uyghurlarning yéngi déhlidiki xitay elchixanisigha térrorluq hojum qozghashni pilanlawatqanliqi heqqide uchurgha érishkenlikini uqturghan hemde ulardin hindistandiki xitay organlirini qoghdashni telep qilghan. Biraq, hindistanda, hazirghiche héchqandaq weqe yüz bermidi.

Bash shtabi gérmaniyidiki dunya Uyghur qurultiyi, xitay hökümitining chet'eldiki Uyghurlarning milliy musteqilliq heriketlirini qarilash üchün xata uchurlarni tarqitiwatqanliqini eyiplimekte. (Arzu)