Kishilik hoquq emeldarliri: ten jazasi qobul qilinmaydighan qilmish

B d t ning kishilik hoquq komitétining ten jazasi ishliri boyiche tekshürüsh emeldarliri jüme küni bayanat élan qilip, ten jazasi xelq'ara qanunlarda cheklen'gen qilmish shundaqla " bezi döletler" ten jazasini qanunlashturushqa urunmaqta, dep körsetti.

B d t kishilik hoquq komitétidiki ten jazasini tekshürüsh ishlirigha mes'ul mutexessisler shenbe küni yétip kélidighan dunya kishilik hoquq küni munasiwiti bilen élan qilghan bayanatida, asasi erkinlikke hörmet qilmay turup bixeterlikke érishkili bolmaydu, dep tekitligen.

Mutexessisler, bayanatida ten jazasini qanunlashturushqa urun'ghan döletlerning ismini tilgha almighan bolsimu, emma b d t ning alahide tekshürüsh emeldari ötken hepte béyjing, lxasa we ürümchilerde tekshürüsh élip barghandin kéyin xitayda ten jazasining omumyüzlük ehwal ikenlikini ilgiri sürgen.

B d t emeldarlirining bayanatida " biz kishilik hoquq küni munasiwiti bilen bezi döletlerning xelq'ara kishilik hoquq qanunidin chetnep kona usuldiki qilmishlarni yéngi namlar bilen yépishqa urunuwatqanliqidin bi'aram boliwatqanliqimizni tekitlimekchimiz " deydu. Amérika térrorchiliqqa qarshi urushta esir élin'ghan gumanliq unsurlargha ten jazasi bérish bilen eyiblenmekte idi. Biraq amérika tashqi ishlar ministiri kondiliza rayis bu eyibleshni ret qildi. Bayanatqa b d t bash katipi kofi annanning ten jazasini tekshürüsh boyiche alahide emeldari manfrid nowak qatarliq 33 neper b d t emeldari qol qoyghan. Manfrid nowak, ötken hepte Uyghur aptonom rayonining merkizi ürümchide tekshürüsh élip barghan idi. (Erkin)